जिओच्या फ्री प्लानविरुद्ध वोडाफोन कोर्टात

मटा ऑनलाइन वृत्त। नवी दिल्ली

रिलायन्स जिओच्या फ्री व्हॉइस कॉलिंग सेवेवर आक्षेप नोंदवत वोडाफोन इंडियाने कोर्टाचा दरवाजा ठोठावला आहे. रिलायन्स जिओने दिलेली ही ऑफर ट्राय ( टेलिकॉम रेग्युलेटरी अथॉरिटी ऑफ इंडिया) च्या नियमांचे उल्लंघन करणारी असून ट्राय याकडे दुर्लक्ष करत आहे अशी तक्रारच वोडाफोनने दिल्ली हायकोर्टात केली आहे.

इंटर-कनेक्टेड यूसेज चार्जेसने ( आययूसी) ट्रायच्या दराबाबतच्या नियमांनुसार एक मूलभूत दर निश्चित केला होता. यामुळे कोणालाही या यापेक्षा कमी दराची ऑफर देता येत नाही असे वोडाफोनने कोर्टाच्या निदर्शनास आणून दिले.

रिलायन्स जिओने आपली फ्री व्हॉइस कॉल्स ऑफर ही प्रमोशनल ऑफर म्हणून ९० दिवसांहून अधिक काळ सुरूच ठेवली. असे करून जिओने आययूसी आणि ट्राय या दोन्हीच्या नियमांचे उल्लंघन केले आहे असा थेट आरोप वोडाफोन इंडियाने लावला आहे.

वोडाफोन इंडियाच्या या तक्रारीनंतर पुढे ट्रायने जिओला क्लिन चिट दिल्यानंतरही जर वोडोफोन इंडियाला आक्षेप असेल तर त्यांनी भारती एअरटेल आणि आयडिया सेल्युलरप्रमाणे टेलिकॉम प्रकरणासाठी निर्माण झालेल्या ट्रायब्युनल (TDSAT) कडे जावे असे रिलायन्स जिओचे म्हणणे आहे. आता या प्रकरणी २७ फेब्रुवारीला दिल्ली हायकोर्टात सुनावणी होणार आहे.