नवी दिल्ली :
‘तुम्ही मत देताना अशा नेत्याला द्या, जो तुमच्या मुलांना अयोध्या किंवा कुंभला नव्हे तर ऑक्स्फर्ड किंवा केंब्रिज विद्यापीठात पाठवेल,’ असे आवाहन गुजरातचे आमदार जिग्नेश मेवाणी यांनी रविवारी केली. पूर्व दिल्ली मतदारसंघातील आम आदमी पक्षाच्या (आप) उमेदवार आतिशी मार्लेना यांच्या प्रचारार्थ ते बोलत होते.
‘पंतप्रधान नरेंद्र मोदी हिंदू-मुस्लिम राजकारण करून गरीब मुलांना अयोध्येत पाठवू इच्छितात. परंतु, आम्ही पुढील पिढीला अयोध्ये किंवा कुंभला नव्हे तर ऑक्स्फर्ड किंवा केंब्रिज विद्यापीठात पाठवू इच्छितो, जिथे तुमच्या उमेदवार आतिशी यांनी शिक्षण घेतले आहे,’ असे मेवाणी म्हणाले.
तसेच, गोरखपूरमधील बीआरडी मेडिकल कॉलेजमध्ये ६३ बालकांच्या मृत्यू प्रकरणात चर्चेत आलेले डॉ. कफील खान यांनीही मुस्लिमबहुल निजामुद्दीन भागात आतिशी यांचा प्रचार केला. ‘मृतावस्थेत असलेल्या बालकांना ऑक्सिजनचा पुरवठा करणाऱ्याला ‘आप’कडून हिरो समजले जाते. आतिशी यांचा सामना राष्ट्रीय स्वयंसेवक संघाचे समर्थन असलेल्या क्रिकेटपटूशी (गौतम गंभीर) आहे. त्यामुळे, मतदारांनी एकजुटीने आतिशी यांना मतदान करायला हवे. त्याबाबत कोणताही संभ्रम बाळगू नये,’ असे आवाहन खान यांनी केले.