ऑगस्टा वेस्टलँड: एस. पी. त्यागी यांना जामीन

मटा ऑनलाइन वृत्त । नवी दिल्ली

ऑगस्ट वेस्टलँड हेलिकॉप्टर खरेदीत लाच घेतल्याप्रकरणी अटक करण्यात आलेले हवाई दलाचे माजी प्रमुख एस. पी. त्यागी यांना मोठा दिलासा मिळाला आहे. दिल्लीतील पटियाला हाउस न्यायालयानं त्यांना काही अटींवर जामीन मंजूर केला आहे. याच प्रकरणातील अन्य दोन आरोपींना मात्र जामीन नाकारण्यात आला आहे.

काँग्रेस सरकारच्या कार्यकाळात ऑगस्टा वेस्टलँड या ब्रिटिश कंपनीशी हेलिकॉप्टर खरेदीचा सौदा झाला होता. या व्यवहारात कंपनीला फायदा व्हावा म्हणून मध्यस्थांनी एस. पी. त्यागी यांना लाच दिली होती. त्यागी यांचा भाऊ संजीव त्यागी यालाही लाच मिळाली होती. या प्रकरणी त्यागी बंधूंसह त्यांचा वकील संजीव गौतम खेतान याला सीबीआयनं अटक केली होती. पैकी एस. पी. त्यागी यांना आज २ लाख रुपयांच्या जातमुचलक्यावर सोडण्यात आले. साक्षीदारांवर दबाव न टाकण्याच्या तसंच, न्यायालयाच्या परवानगीशिवाय दिल्लीबाहेर न जाण्याच्या अटीवर त्यांना जामीन देण्यात आला आहे. त्यागी यांचा भाऊ संजीव व वकील गौतम खेताना यांचा मात्र न्यायालयानं जामीन नाकारला आहे. त्यांच्या जामिनावर ४ जानेवारीला सुनावणी होणार आहे.