‘मी आणि राहुल एका सायकलीची दोन चाके’

वृत्तसंस्था, लखनऊ

‘उत्तर प्रदेशच्या मतदारांनी निवडणुकीच्या आधीपासूनच विकासाला गती देण्याचे निश्चित केले आहे. त्यामुळे या निवडणुकीत समाजवादी पक्ष व काँग्रेस आघाडीला ३०० हून अधिक जागा मिळतील,’ असा दावा राज्याचे मुख्यमंत्री अखिलेश यादव व काँग्रेसचे उपाध्यक्ष राहुल गांधी यांनी रविवारी केला. ‘मी आणि राहुल एकाच सायकलीची दोन चाके आहोत,’ असेही अखिलेश यांनी नमूद केले.

समाजवादी पक्ष आणि काँग्रेसच्या आघाडीनंतर पहिल्यांदाच अखिलेश आणि राहुल यांनी एकत्रित पत्रकार परिषद घेतली. त्यापूर्वी दोन्ही नेत्यांनी एकमेकांना पुष्पगुच्छ भेट देऊन गळाभेट घेतली. या वेळी ‘यूपी को यह साथ पसंद है...’ या गाण्याचेही लाँचिंग करण्यात आले. अखिलेश आणि राहुल या दोन्ही नेत्यांनी एकमेकांची स्तुती करीत समाजवादी पक्ष - काँग्रेस आघाडीचीच सत्ता येणार असल्याचा विश्वास व्यक्त केला. दरम्यान, सप आणि काँग्रेसच्या आघाडीबाबत सपचे सर्वेसर्वा मुलायमसिंह यादव यांनी नाराजी व्यक्त केली असून, आपण त्यांच्यासाठी प्रचार करणार नसल्याचे म्हटले आहे.