मल्ल्याच्या कर्जांची नोंद आमच्याकडे नाही

वृत्तसंस्था, नवी दिल्ली

हजारो कोटींची कर्जे बुडवून परदेशात पसार झालेल्या उद्योगपती विजय मल्ल्या याला देण्यात आलेल्या कर्जांची माहिती आपल्याकडे नाही, असे उत्तर केंद्रीय अर्थ मंत्रालयाने केंद्रीय माहिती आयोगापुढे दिले आहे. मात्र हे उत्तर ‘अस्पष्ट आणि कायद्याच्या निकषावर टिकणारे नाही’ या शब्दांत अर्थ मंत्रालयाला फटकारतानाच, हा अर्ज उत्तरासाठी योग्य सरकारी यंत्रणेकडे सोपवण्याचे निर्देशही आयोगाने दिले.

राजीव खरे यांनी मल्ल्या याच्या कर्जांची माहिती अर्थ मंत्रालयाकडे मागितली होती. मात्र उत्तर न मिळाल्याने त्यांनी केंद्रीय माहिती आयोगाकडे धाव घेतली होती. व्यक्तीची सुरक्षा व राज्याच्या आर्थिक हितावर होणारा दुष्परिणाम याबाबत अपवादाच्या तरतुदींच्या आधारे ही माहिती देता येत नसल्याचे उत्तर अर्थ मंत्रालयाने दिले होते. अर्जदाराला हवी असलेली माहिती अर्थ मंत्रालयाकडे नाही, ही माहिती संबंधित बँका किंवा रिझर्व्ह बँकेकडे असू शकते, असे मत नोंदवत केंद्रीय माहिती आयुक्त आर. के. माथुर यांनी हा अर्ज योग्य यंत्रणेकडे पाठवण्याचे निर्देश दिले.