भारत आणि संघ हे समानार्थी शब्द

इम्रान खानच्या वक्तव्यावर संघाची प्रतिक्रिया

वृत्तसंस्था, नवी दिल्ली

भारत आणि राष्ट्रीय स्वयंसेवक संघ हे आता समानार्थी शब्द झाले आहेत, अशी प्रतिक्रिया संघाने शनिवारी व्यक्त केली. पाकिस्तानचे पंतप्रधान इम्रान खान यांनी संयुक्त राष्ट्रसंघात भारतावर टीका करताना संघावरही हल्ला केला होता. त्यावर संघाचे सह सरकार्यवाह कृष्णगोपाल सविस्तर प्रतिक्रिया व्यक्त केली आहे. येथे झालेल्या एका कार्यक्रमात ते बोलत होते. 'संघ दहशतवादाला विरोध करतो. संघ भारतात आणि भारतासाठीच आहे. पाकिस्तानचा आमच्यावर राग का आहे? त्याचा अर्थ असा की, जर ते संघावर संतप्त असतील तर, त्यांचा भारतावरही राग आहे. संघ आणि भारत हे आता समानार्थी शब्द झाले आहेत. जगानेही हे समजून घ्यावे,' असे गोपाल यांनी स्पष्ट केले.

इम्रान खान संघाचे नाव घेत आहेत. त्यांनी आता थांबू नये. ते आमची प्रसिद्धी करीत आहेत. आम्ही त्यांचे अभिनंदन करतो. दहशतवादाला विरोध करणाऱ्यांना आणि त्यामुळे त्रस्त झालेल्यांना आता समजले असेल की, संघही दहशतवादाच्या विरोधात आहे.

-कृष्णगोपाल,

सह सरकार्यवाह, राष्ट्रीय स्वयंसेवक संघ