भारतीय जवानांसाठी टाळ्यांचा कडकडाट!

मटा ऑनलाइन वृत्त । नवी दिल्ली

एखादी मोठी स्पर्धा जिंकून आल्यानंतर भारतीय क्रिकेट संघाचं किंवा क्रीडापटूंचं विमानतळावर होणारं जंगी स्वागत आपण अनेकदा पाहिलंय. पण, काही दिवसांपूर्वी दिल्लीच्या इंदिरा गांधी आंतरराष्ट्रीय विमानतळावर भारतीय जवानांच्या एका तुकडीचं टाळ्यांच्या कडकडाटात स्वागत करण्यात आलं आणि सगळ्यांचाच ऊर अभिमानानं भरून आला. ही घटना या महिन्याच्या सुरुवातीला घडल्याचं कळतं. त्याचा व्हिडिओ आता सोशल मीडियावर व्हायरल होतोय.

'सर्जिकल स्ट्राइक'नंतर देशभरातून कौतुकाची थाप मिळवणारं भारतीय लष्कर गेल्या काही दिवसांत पुन्हा चर्चेत आलंय. काश्मीरमध्ये सीआरपीएफ जवानांना मिळालेली हीन दर्जाची वागणूक, निवडणुकीचं काम संपवून परतताना काश्मिरी तरुणांनी त्यांना मारलेल्या लाथा, थपडा, त्या पाठोपाठ मानवी ढाल प्रकरणाचा व्हिडिओ यामुळे त्यांच्याबाबत उलटसुलट चर्चा सुरू आहे. अर्थात, सरकार आणि देशप्रेमी जनता त्यांच्या पाठीशी खंबीरपणे उभी आहे. लष्कराबद्दलचा आदर दिवसेंदिवस वाढतच चाललाय. दिल्ली एअरपोर्टवर त्यांच्यासाठी वाजलेल्या टाळ्या आणि उपस्थितांनी त्यांना ठोकलेला सॅल्युट, यातून त्याचाच प्रत्यय येतो.



लष्कराच्या गणवेशात कुणीही दिसलं तर उभं राहून त्यांना सॅल्युट करा, असं आवाहन मध्यंतरी बॉलिवूड अभिनेता अक्षय कुमारनं केलं होतं. त्याच्या या भावनेला हळूहळू प्रतिसाद मिळाला, दिल्ली विमानतळावर जे घडलं, तसं वरचेवर घडू लागलं तर लष्कराचं मनोबल नक्कीच उंचावेल.