प. बंगालमध्ये ७८.०५ टक्के मतदान

४९ मतदारसंघांत विविध घटनांत २२९ जणांना अटक

वृत्तसंस्था, कोलकाता

पश्चिम बंगाल विधानसभा निवडणुकीच्या सोमवारी झालेल्या चौथ्या टप्प्यात ७८.०५ टक्के मतदानाची नोंद झाली. राज्यातील ४९ मतदारसंघांसाठी मतदान झाले असून, मतदानाशी संबंधित विविध घटनांमध्ये २२९ जणांना अटक करण्यात आली आहे.

तृणमूल काँग्रेसच्या कार्यकर्तीला मतदान केंद्रावर धक्काबुक्की केल्याच्या आरोपावरून भारतीय जनता पक्षाच्या नेत्या, अभिनेत्री रूपा गांगुली यांच्यावर एफआयआर दाखल करण्यात आला आहे. सोमा दास यांचा हात धरून त्यांना मतदान करू न देण्याचा प्रयत्न रूपा गांगुली यांनी केल्याचे टीव्हीवर दिसून आले. मदतान करू नकोस, असे आपल्याला सांगितल्याचे सोमा दास यांनी म्हटले आहे. दरम्यान, काही घटनांमध्ये काही निवडणूक अधिकाऱ्यांना अयोग्य मार्गदर्शन करीत असल्याच्या कारणावरून हटवून त्या जागी अन्य अधिकाऱ्यांना काम करण्यास सांगण्यात आले. डमडम मतदारसंघात मार्क्सवादी कम्युनिस्ट पक्षाचे उमेदवार तन्मय भट्टाचार्य यांच्या मोटारीवर दगडफेक झाल्याने ते जखमी झाले आहेत. या प्रकरणात चार जणांना अटक करण्यात आली आहे.

तृणमूल काँग्रेसच्या कार्यकर्त्यांनी आपल्याला धक्काबुक्की केल्याचा आरोप मार्क्सवादी कम्युनिस्ट पक्षाचे उमेदवार देवाशिष भौमिक यांनी केला आहे. भाजपच्या

उमेदवार लॉकेट चटर्जी यांचीही मतदान केंद्रावर बाचाबाची झाली.

दरम्यान, मतदान केंद्र ताब्यात घेणे, बनावट मतदान, ईव्हीएम मशिन नादुरुस्त आदी कारणावरून निवडणूक आयोगाकडे ४,१०० तक्रारी दाखल झाल्या आहेत.