जसोदाबेनना पाहून ममता भेटीसाठी धावल्या!

कोलकाता: पंतप्रधान नरेंद्र मोदी यांच्या कडव्या विरोधक म्हणून ओळखल्या जाणाऱ्या पश्चिम बंगालच्या मुख्यमंत्री ममता बॅनर्जी यांच्या स्वभावाचा एक वेगळा पैलू मंगळवारी पाहायला मिळाला. निमित्त होतं मोदींच्या पत्नी जसोदाबेन यांच्याशी झालेल्या त्यांच्या भेटीचं. या भेटीदरम्यान ममतांनी जसोदाबेन यांची विचारपूस केलीच, शिवाय त्यांना एक साडीही भेट दिली. त्यांच्या या आतिथ्यशील स्वभावाची चर्चा सध्या राजकीय वर्तुळात रंगली आहे.

सूत्रांनी दिलेल्या माहितीनुसार, जसोदाबेन या मंगळवारी झारखंडमधील धनबादचा दौरा करून परतत होत्या. त्याचवेळी ममता बॅनर्जी कोलकात्याहून दिल्लीला निघाल्या होत्या. त्या विमानात बसणार इतक्यात त्यांनी जसोदाबेन यांना विमानतळावर पाहिले. त्यांना पाहताच ममता त्यांच्या भेटीसाठी धावल्या. त्यांनी जसोदाबेन यांची विचारपूस केली. त्यांच्यासाठी काही वेळ संवाद साधला. अचानक झालेल्या या भेटीतही आदरातिथ्य म्हणून ममतांनी त्यांना साडी भेट दिली. ममतांच्या भेटीनं जसोदाबेनही सुखावल्या.

ममता बॅनर्जी आज पंतप्रधान नरेंद्र मोदी यांची भेट घेणार आहेत. या भेटीत त्या राज्यापुढील आर्थिक बाबींवर चर्चा करणार आहेत.