'देशात अपयशी नेते अमेरिकेत भाषणे ठोकतात'

मटा ऑनलाइन वृत्त । कोलकाता

देशात अपयशी ठरलेल्या नेत्यांचं कोणी ऐकत नाही म्हणून हे नेते अमेरिकेत जाऊन भाषण ठोकतात, अशी टीका भाजपचे राष्ट्रीय अध्यक्ष अमित शहा यांनी राहुल गांधी यांचं नाव न घेता केली. काँग्रेसचे उपाध्यक्ष राहुल गांधी यांनी अमेरिकेत जाऊन पंतप्रधान नरेंद्र मोदी यांच्यावर टीका केली होती.

कोलकात्याच्या दौऱ्यावर असलेल्या अमित शहा यांनी पुन्हा एकदा राहुल गांधी यांना लक्ष्य केले. सध्याचे सरकार कामगिरीला महत्व देते. सरकारची स्थिती काँग्रेस सरकारसारखी नाही. कामगिरीच्या जोरावर सरकार चालवण्याची सुरुवात भाजपने केली. परंतु देशातील काही नेते अमेरिकेत जाऊन भाषणे देतात. कारण त्यांना देशात कोणी विचारत नाही. त्यांचं कोणी ऐकून घेत नाहीत, असा टोला अमित शहा यांनी लगावला.

राहुल गांधींनी अमेरिकेती बर्कले विद्यापीठात भाषण केले. राहुल गांधींनी या भाषणात केंद्र सरकारच्या निर्णयांवरुन मोदींना लक्ष्य केले होते. ‘मोदींच्या राजवटीत हिंसा, द्वेष आणि ध्रुवीकरणाच्या राजकारणाने डोके वर काढले आहे. हे मुद्दे देशासाठी नवे असून, हाच ‘न्यू इंडिया’ आहे,’ अशा शब्दांमध्ये राहुल गांधींनी मोदींवर शरसंधान साधले होते. राहुल यांच्या या भाषणावरुन काँग्रेस आणि भाजपमध्ये जुंपली आहे.