हवामान विभागाचे काय चुकले?

नवी दिल्ली : सरासरीपेक्षा कमी पावसाचा प्राथमिक अंदाज वर्तवणाऱ्या भारतीय हवामान विभागाने आपल्या चुकलेल्या अंदाजाचे विश्लेषण करण्याचा निर्णय घेतला आहे. यंदा सरासरीच्या १० टक्के अधिक पाऊस झाल्याने हवामान खाते तसेच स्कायमेट या खासगी हवामान संस्थेचा भारतातील मान्सूनबाबतचा अंदाज सपशेल चुकीचा ठरला.

हवामान खात्याने सरासरीच्या ९६ टक्के पाऊस होईल, असा अंदाज एप्रिलमध्ये वर्तवला होता. तर 'स्कायमेट'ने हीच टक्केवारी ९३ असेल, असे नमूद केले होते. हे अंदाज अधिक-उणे ५ अंशांनी बदलू शकतात, असेही दोन्ही संस्थांनी स्पष्ट केले होते. मात्र, तरीही हे दोन्ही अंदाज चुकीचे ठरत देशात १० टक्के अधिक पाऊस झाला. जुलैमध्ये सरासरीच्या १०५ टक्के, ऑगस्टमध्ये ११५ टक्के (सन १९९६नंतर सर्वाधिक), तर सप्टेंबरमध्ये १५२ टक्के पाऊस झाला. यामुळे हवामान खात्याने आता आपल्याच अंदाजाचे विश्लेषण करण्याचा निर्णय घेतला आहे. हवामान विभागाचे महासंचालक मोहपात्रा यांनी आपल्याच विभागाचे काय चुकले याचा शोध घेण्याचे ठरवले आहे.