​'बाळासाहेबांच्या भेटीमुळे सोनिया नाराज होत्या'

मटा ऑनलाइन वृत्त । नवी दिल्ली

'राष्ट्रपतिपदाचा उमेदवार या नात्यानं शिवसेनेचा पाठिंबा मिळावा यासाठी शिवसेनाप्रमुख बाळासाहेब ठाकरे यांची 'मातोश्री' वर जाऊन भेट घेतली तेव्हा काँग्रेसच्या अध्यक्षा सोनिया गांधी माझ्यावर नाराज झाल्या होत्या', असा गौप्यस्फोट माजी राष्ट्रपती प्रणव मुखर्जी यांनी आपल्या आत्मचरित्रात केला आहे.

'द कोएलिशन इअर्स: १९९६-२०१२' या आत्मचरित्रात मुखर्जी यांनी हा गौप्यस्फोट केला आहे. राष्ट्रवादीचे नेते शरद पवार यांच्या पुढाकारातून मी शिवसेनाप्रमुख बाळासाहेब ठाकरे यांची भेट घेतली होती. बाळासाहेबांना भेटण्याचा सल्ला मला शरद पवार यांनीच दिला होता, असा दावाही या पुस्तकात करण्यात आला आहे. यूपीएचे राष्ट्रपतिपदाचे उमेदवार म्हणून २००४ साली प्रणव मुखर्जी यांच्या नावाची घोषणा झाल्यानंतर प्रणव मुखर्जी मुंबई दौऱ्यावर आले होते.

मुंबई दौऱ्यात बाळासाहेब ठाकरे यांची मातोश्रीवर जाऊन भेट घ्यायची असे मी शरद पवारांना सांगितल्यानंतर पवारांनी तात्काळ होकार दर्शवला. या भेटीत बाळासाहेबांसोबत दिलखुलास गप्पा झाल्या. यावेळी बाळासाहेब विनोद करीत म्हणाले की, हा पाठिंबा म्हणजे मराठा टायगरचा बंगाल टायगरला पाठिंबा आहे. बाळासाहेबांसोबतच्या भेटीनंतर दुसऱ्या दिवशी दिल्लीत परतल्यानंतर गिरिजा व्यास यांनी मला बोलावून घेतले व बाळासाहेबांसोबतच्या भेटीवर सोनिया गांधी आणि त्यांचे राजकीय सल्लागार अहमद पटेल नाराज आहेत, असे सांगितले. मी त्यांना माझ्या परिने समाजावून सांगितले, असे या पुस्तकात म्हटले आहे.