तुम्ही ट्विटरवर आहात का? पत्रकाराचा मोदींना प्रश्न

मटा ऑनलाइन वृत्त । नवी दिल्ली

सोशल मीडियावर सतत अॅक्टीव्ह असणाऱ्या पंतप्रधान नरेंद्र मोदी यांना तुम्ही ट्विटरवर आहात का? असा प्रश्न कोणी विचारला तर हे नक्कीच हास्यास्पद ठरेल. त्यातही असा प्रश्न विचारणारी व्यक्ती पत्रकार असेल तर ? अशीच घटना रशियामध्‍ये एका महिला पत्रकाराबद्‍दल घडली आहे.

NBC न्यूजची पत्रकार मॅगीन केली हिने भारताचे पंतप्रधान नरेंद्र मोदी यांच्या सोबत सेंट पीटर्सबर्ग येथील कोनस्टॅन्टीन पॅलेसमध्ये स्टेट डिनर पार्टीदरम्यान संवाद साधला. या वेळी मॅगीनने पंतप्रधान यांना तुम्‍ही ट्‍विटरवर आहात का? असा प्रश्‍न विचारला. यावर मोदींनी हसत हसत 'हो' असं उत्तर दिलं.

कोणत्याही देशाच्या पंतप्रधान ,राष्ट्रपती यांसारख्या उच्च पदावरील व्यक्तींची मुलाखत घ्यायची किंवा संवाद साधायचा असेल तर पत्रकाराने त्या व्यक्तींबद्दल काही माहिती मिळवणे गरजेचे असते. खरतर अशा मोठ्या व्यक्तीं बद्दल माहिती मिळवणं काही कठीण नसतं. एखाद्या पंतप्रधानांची मुलाखत घेताना पत्रकाराने एखादी गोष्‍ट माहित नसताना ती समोरच्‍या व्‍यक्‍तीला विचारणे म्‍हणजे हास्‍यास्‍पद बाब आहे.

खरतर भारताचे पंतप्रधान नरेंद्र मोदी हे जगातील सर्वाधिक फॉलोअर्स असलेले राजकीय नेत्यांच्या यादीत दुसऱ्या स्थानावर आहेत तर अमेरिकेचे राष्ट्राध्यक्ष डोनाल्ड ट्रम्प हे पहिल्या क्रमांकावर आहेत. मोदींसाख्या व्यक्तीला असा प्रश्न विचारल्यामुळं पत्रकार मॅगीन केली हिची ट्विटरवर खिल्ली उडवण्यात येत आहे.