महिषासुराच्या वधाचे दुखः व्यक्त करतो 'हा' समाज

मटा ऑनलाइन वृत्त । कोलकत्ता

देशात नवरात्र उत्सवाची जय्यत तयारी सुरू असली तरी देशात असाही काही समाज आहे जो नवरात्र उत्सवा दरम्यान देवीच्या आगमनाची तयारी न करता असुरराज महिषासुराच्या मृत्युचा शोक व्यक्त करतो. महत्त्वाचं म्हणजे हे लोक दुसरे तिसरे कोणी नसून खुद्द महिषासुराचे वशंज असल्याचा दावा करतात.

बंगालच्या उत्तरेकडील भागात असलेल्या पुरुलिया व अन्य काही भागात हा उत्सव मोठ्या प्रमाणात साजरा केला जातो. काही ठिकाणी तर या उत्सवाला 'महिषासुराची स्मरणसभा' असे ही म्हणतात. या वर्षी बंगालमध्ये हा उत्सव मोठ्या प्रमाणात साजरा करण्यात येणार असून त्यासाठी राज्यभरातुन किमान ८५० ते ९०० पर्यंत असुर सभा आयोजित करण्यात येणार आहेत.

या प्रथेचा अनेक स्थरातून विरोध करण्यात येत असला तरी हा समाज कोणत्याही प्रकारचा विरोध पत्करण्यास तयार आहे. या महिन्याच्या दोन तारखेला 'पश्चिम बंगाल स्टेट महिषासुर स्मरण सभा समिति'ची पहिली बैठक झाली आहे. दुर्गादेवीची स्थापना होईपर्यंत ते विसर्जना पर्यंत हा समाज महिषासुराच्या मृत्युचे शोक व्यक्त करत असतो.