खिलजीवरून जयाप्रदा-आजम खान यांच्यात जुंपली

रामपूर: 'पद्मावत'मधील अल्लाउद्दीन खिलजीला पाहून सपा नेते आजम खान यांची आठवण झाल्याची टीका अभिनेत्री, माजी खासदार जयाप्रदा यांनी केल्याने आजम खान भडकले आहेत. त्यामुळे या दोघांमध्ये जुंपली असून आजम खान यांनीही जयाप्रदा यांच्यावर तोंडसुख घेतले आहे. 'जयाप्रदा कोण आहेत? मी नाच-गाणं करणाऱ्यांच्या तोंडी लागत नाही,' अशी टीका आजम खान यांनी जयाप्रदा यांच्यावर केली आहे.

जयाप्रदा यांनी केलेल्या वक्तव्यासंदर्भात प्रतिक्रिया विचारली असता आजम खान यांनी ही टीका केली. 'सध्या मी शिक्षण क्षेत्रात व्यस्त आहे. त्यांच्या वक्तव्यावर उत्तर देण्यासाठी माझ्याकडे वेळ नाही. विद्यार्थ्यांच्या शिक्षणाकडे माझा लक्ष आहे. मी नाच-गाणी करणाऱ्यांच्या तोंडी लागत नाही. तसं केलं तर मी राजकारण कसं करणार,' असा सवाल खान यांनी केला.

'पद्मावत'मधील अल्लाउद्दीन खिलजीला पाहिल्यावर मला आजम खानची आठवण झाली. मी निवडणूक लढवत असताना त्यांनी मला खूप त्रास दिला,' अशी टीका जयाप्रदा यांनी शनिवारी केली होती.