...म्हणून मोदींच्या बैठकीत मोबाइल बंदी!

मटा ऑनलाइन वृत्त । नवी दिल्ली

पंतप्रधान नरेंद्र मोदी यांच्या बैठकांमध्ये मोबाइल बंदी का असते, याचे उत्तर खुद्द पंतप्रधानांनीच दिले आहे. बैठकीत बसलेले अधिकारी सोशल साइट्समध्ये गर्क असल्याचे वारंवार निदर्शनास आले आणि म्हणूनच बैठकीत मोबाइल बंदी करण्यात आली, असे मोदींनी नमूद केले.

लोकसेवा दिनानिमित्त आज आयोजित एका कार्यक्रमात मोदींनी अधिकाऱ्यांना मार्गदर्शन केले. यावेळी ड्युटीवर असतानाही सोशल साइट्समध्ये वेळ वाया घालवणाऱ्या अधिकारीवर्गाचे एकप्रकारे मोदींनी कान टोचले.

जिल्हास्तरावरील अधिकाऱ्यांचा सोशल मीडियावर अधिक वावर असल्याचे निदर्शनास आले आहे. काम सोडून हे अधिकारी सोशल मीडियाला प्राधान्य देत आहेत. म्हणूनच याला आळा घालण्यासाठी मला बैठकीत मोबाइल बंदी करावी लागली, असे मोदींनी पुढे स्पष्ट केले.

सोशल मीडिया हे चांगले माध्यम आहे. मात्र त्याचा उपयोग स्वत:साठी नाही तर लोकांच्या भल्यासाठी व्हायला हवा. जर सोशल मीडियाच्या माध्यमातून पोलिओ लसीकरणाची तारीख लोकांपर्यंत पोहोचवण्याचे काम मी करत असेन तर ती चांगली बाब आहे मात्र पोलिओ लसीकरण मोहिमेत भाग घेतल्याचा फोटो फेसबुकवर शेअर करून चमकोगिरी करण्याकडे माझा ओढा असेल तर ती गंभीर बाब आहे, असे मोदींनी सुनावले.