पंतप्रधान नरेंद्र मोदी अद्याप गप्प का?

वृत्तसंस्था, कमला
‘भारतीय जनता पक्षाचे राष्ट्रीय अध्यक्ष अमित शहा यांचा मुलगा जय यांच्या मालकीच्या कंपनीची उलाढाल तब्बल १६ हजार पटींनी वाढल्याच्या बातम्या आल्यानंतरही पंतप्रधान नरेंद्र मोदी गप्प का,’ असा सवाल काँग्रेसचे उपाध्यक्ष राहुल गांधी यांनी केला आहे. गुजरातमध्ये विधानसभा निवडणुकीच्या दुसऱ्या टप्प्यामध्ये ते बोलत होते.

राहुल म्हणाले, ‘२०१४ मध्ये कंपनीचे अस्तित्व किरकोळ होते. मात्र, मोदी सरकार सत्तेत आल्यानंतर मात्र कंपनी प्रचंड नफ्यात सुरू झाली. मोदी सत्तेत आल्यानंतर त्यांनी मेक इन इंडिया अभियान सुरू केले. गेल्या वर्षी नोटाबंदी केली. जीएसटी आणला. यामुळे लहान उद्योजक आणि शेतकऱ्यांना फटका बसला. एकीकडे उद्योजक श्रीमंत होत आहेत, तर गरीब आणखी गरीब होत आहेत.’ सोशल मीडियाच्या माध्यमातूनही राहुल गांधींनी भाजपला लक्ष्य केले. तुम्ही ‘चौकीदार’ आहात की ‘भागीदार’ असा प्रश्न त्यांनी जय शहा यांच्यावर होणाऱ्या आरोपांच्या संदर्भाने विचारला.

खेडा जिल्ह्यातील जाहीर सभेत राहुल गांधी यांनी भाजप आणि नरेंद्र मोदींवर टीका केली. ‘गुजरातमध्ये विकासाला काय झाले? हा विकास वेडा का झाला?, खोटे ऐकून ऐकून हा ‘विकास’ वेडा झाला, असा चिमटा त्यांनी काढला. नरेंद्र मोदींचे ‘गुजरात मॉडेल’ फेल असून, गुजरातमधील जनतेलाही याची जाणीव आहे,’ असे त्यांनी सांगितले. गुजरातमध्ये काँग्रेसची सत्ता आल्यास अगदी छोट्या छोट्या कामातही आम्ही जनतेचे मत जाणून घेणार, असे आश्वासन त्यांनी दिले.

राहुल गांधी यांचा हा दुसरा गुजरात दौरा आहे. पहिल्या दौऱ्यात राहुल गांधी यांना चांगला प्रतिसाद मिळाल्याने काँग्रेसच्या गोटात उत्साह आहे.