वृत्तसंस्था, लखनऊ
उत्तर प्रदेशचे माजी मुख्यमंत्री, राजस्थानचे माजी राज्यपाल व सोमवारी भाजपचे सदस्यत्व पुन्हा स्वीकारलेले कल्याणसिंह यांच्यावर समन्स बजवण्याची तयारी सीबीआयने सुरू केली आहे. बाबरी मशीद पतन प्रकरणी हे समन्स बजावण्यात येणार असून यासाठी सीबीआयने न्यायालयात धाव घेतली आहे.
बाबरी मशीद पाडली त्यावेळी, १९९२मध्ये कल्याणसिंह उत्तर प्रदेशचे मुख्यमंत्री होते. या घटनेनंतर कल्याणसिंहांनी मुख्यमंत्रिपदाचा राजीनामा दिला होता. कल्याणसिंह बाबरी मशिद प्रकरणातील आरोपी आहेत. मात्र घटनात्मक राज्यपालपद स्वीकारल्यामुळे घटनेच्या कलम ३६१नुसार त्यांच्यावर खटला चालवता येत नव्हता. आता त्यांच्यावर खटला चालवण्याचा मार्ग मोकळा झाला आहे.
कलराज मिश्रा यांनी गुजरातच्या राज्यपालपदाची शपथ घेतल्यानंतर कल्याणसिंह यांचा पाच वर्षांचा कार्यकाळ समाप्त झाला. राज्यपालपदाचा कार्यकाळ पूर्ण झाल्यानंतर सिंह पुन्हा भाजपमध्ये सक्रिय झाले आहेत. ८७ वर्षीय कल्याणसिंह यांनी उत्तर प्रदेश भाजपचे अध्यक्ष स्वतंत्र देवसिंह यांच्या उपस्थितीत पक्षाचे सदस्यत्व स्वीकारले. या वेळी त्यांचा मुलगा व इटाहाचे खासदार राजवीरसिंह, योगी आदित्यनाथ यांच्या मंत्रिमंडळात अर्थराज्यमंत्री असलेले नातू संदीपसिंह उपस्थित होते.