नोएडामध्ये पुन्हा सामूहिक बलात्कार

मटा ऑनलाइन वृत्त । गुरगाव

गुरगावमधून अपहरण केलेल्या एका महिलेवर तीन पुरुषांनी धावत्या कारमध्ये चार ते पाच तास सामूहिक बलात्कार करून नंतर तिला ग्रेटर नोएडा येथे कारमधून बाहेर ढकलून दिल्याची धक्कादायक घटना उघडकीस आली आहे. या घटनेमुळे मनेसर येथे सुमारे महिन्याभरापूर्वी झालेल्या सामूहिक बलात्काराच्या घटनेची आठवण झाली आहे.

राजस्थानातील भरतपूर येथून आलेली ही ३५ वर्षीय महिला गुरगावमधील सोहना भागात सोमवारी रात्री ८ वाजता रस्त्यावर चालत असताना स्विफ्ट कारमधून आलेल्या पुरुषांनी तिला गाडीत खेचले. ही गाडी राजधानी परिसरात फिरवत तिघांनी तिच्यावर सामूहिक बलात्कार केला आणि अंधारातच ग्रेटर नोएडा येथे तिला गाडीबाहेर फेकले. गोल्फ लिंक्स भागात पहाटे ४ वाजण्याच्या सुमारास स्थानिकांनी तिला पाहिल्यानंतर पोलिसांना कळवले. नोएडा आणि गुरगाव पोलिस याप्रकरणी तपास करत असून या प्रकरणी मंगळवारी उशिरापर्यंत कोणालाही अटक झालेली नव्हती. पोलिसांना क‍ळवल्यास गंभीर परिणाम होतील, अशी धमकीही या आरोपींनी पीडित महिलेला दिली. या घटनेमुळे गुरगाव आणि नोएडासह दिल्लीतही पोलिसांची गस्त किती कुचकामी आहे, हे स्पष्ट झाले आहे.