विद्यार्थिनीसाठी तरुणीने चालवली रिक्षा

सामाजिक भान जपत बेळगावात रंगपंचमी

म. टा. वृत्तसेवा, बेळगाव

रंगपंचमीच्या सणाचा उत्साह अतिउत्साहात कधी बदलतो, ते कळत नाही. बारावीची परीक्षा देणाऱ्या एका परीक्षार्थीला अतिउत्साही घटकांचा त्रास होऊ नये, यासाठी एका रिक्षाचालकाच्या पत्नीने रिक्षा चालवत त्या विद्यार्थिनीला परीक्षा केंद्रावर सोडले. असे सामाजिक भान जपत बेळगाव शहरात सोमवारी रंगपंचमी उत्साही वातावरणात साजरी करण्यात आली.

विविध रंगांची उधळण, चेहेऱ्यावर घातलेले चित्रविचित्र मुखवटे, डॉल्बीच्या दणदणाट सुरू असलेले तरुणाईचे नृत्य, पाण्याचा अत्यल्प वापर, शहरातील अनेक ठिकाणी आयोजित करण्यात आलेले कार्यक्रम ही या सणाची वैशिष्ट्ये ठरली.

बारावीचा पेपर असल्यामुळे सोमवारी काही विद्यार्थ्यांना परीक्षा केंद्रापर्यंत पोचताना अडचणींना सामोरे जावे लागले. एका परीक्षार्थीला परीक्षाकेंद्रावर जाण्यासाठी जवळच्याच रिक्षाचालकाशी संपर्क साधला. मात्र, तो रंग खेळण्यासाठई गेला होता. अखेर त्याच्या पत्नीने तरुणीने रिक्षा चालवून त्या विद्यार्थिनीला तिच्या कुटुंबीयांसमवेत परीक्षा केंद्रावर पोचवून सामाजिक बांधिलकी जपली.

सीपीएड मैदानावर कर्नाटक महिला प्रदेश काँग्रेस अध्यक्षा लक्ष्मी हेब्बाळकर यांनी केवळ महिलांसाठी वुमेनिया कार्यक्रमाचे आयोजन केले होते. कार्यक्रम महिलांसाठी असल्यामुळे महिला आणि तरुणींनी ऑर्केस्ट्राच्या तालावर नृत्य करीत आनंद लुटला. हेब्बाळकर देखील वुमेनिया कार्यक्रमात सहभागी झाल्या.

व्हॅक्सिन डेपो मैदानावर माजी आमदार अभय पाटील यांनी आयोजित केलेल्या होळी मिलन कार्यक्रमाला देखील उत्स्फूर्त प्रतिसाद मिळाला. सगळ्या वयोगटातील व्यक्तींनी होळी मिलन कार्यक्रमात सहभागी होऊन रंगपंचमीचा आनंद लुटला.

पांगुळ गल्ली येथील अश्वत्थामा मंदिरासमोर परंपरेप्रमाणे लोटांगण घालण्यात आले. दक्षिण भारतातील एकमेव मंदिर अशी ख्याती असलेल्या अश्वत्थामा मंदिरासमोर शेकडो भक्त लोटांगण घालण्यासाठी जमले होते.