मध्य प्रदेशात दोन शीर व तीन हाताच्या बाळाचा जन्म

मध्य प्रदेशः एका महिलेने दोन शीर व तीन हात असणाऱ्या बाळाला जन्म दिला आहे. मध्य प्रदेशमधील विदीशा शहरात ही घटना घडली असून बाळाच्या जन्माबाबत आश्चर्य व्यक्त केलं आहे.

बबिता अहिरवार असं या महिलेचं नाव असून हे तिचं पहिलंच बाळ आहे. बबिताला प्रसुती कळा सुरु झाल्यानंतर जिल्हा रूग्णालयात दाखल करण्यात आलं. तिथं तिनं दोन शीर आणि तीन हात असलेल्या बाळाला जन्म दिला. सध्या बाळाची आणि आईची प्रकृती स्थिर असली तरी, डॉक्टरांच्या म्हणण्यानुसार, अशा प्रकारच्या घटनांमध्ये बाळाच्या जीवाला धोका संभावतो.

विदीशा जिल्ह्यात अशा प्रकारची घटना पहिल्यांदाच घडली आहे. महिला गरोदर असताना ३५व्या आठवड्यात सोनोग्राफी केल्यानंतर जुळी मुलं असल्याच डॉक्टरांच्या निदर्शनास आलं होतं. मात्र, आईच्या गर्भात असताना बाळांची व्यवस्थित वाढ न झाल्यामुळं बाळ असं जन्माला आल्याचं डॉक्टरांनी म्हटलं आहे. एक लाख रुग्णांमध्ये क्वचितच असे प्रकार घडतात, असं वैद्यकीय तज्ज्ञांचं म्हणणं आहे.