राजस्थानात महिलेवर २३ जणांचा बलात्कार

मटा ऑनलाइन वृत्त । बिकानेर

एका महिलेला कारमध्ये लिफ्ट दिल्यानंतर रस्त्याच्याकडेला नेऊन तिच्यावर २३ जणांनी सामुहिक बलात्कार केल्याची धक्कादायक घटना घडली आहे. राजस्थानच्या बिकानेरमध्ये हा धक्कादायक प्रकार घडला असून पोलिसांनी काही आरोपींना अटक केली आहे.

सदर तरूणी दिल्लीतील राहणारी आहे. २५ सप्टेंबर रोजी ही तरूणी बिकानेरच्या रिदमलसार पुरोहितन परिसरात आली होती. परतताना तिला दोघाजणांनी एसयुव्ही कारमध्ये लिफ्ट दिली. थोड्या अंतरावर गेल्यावर त्यांनी तिला खेचत रस्त्याच्याकडेला नेले आणि तिच्यावर सामुहिक बलात्कार केला. त्यानंतर त्यांनी त्यांच्या काही मित्रांना बोलावून घेतले. त्यांनीही या तरूणीवर बलात्कार करून पळ काढला, अशी माहिती पोलिसांनी दिली.

या महिलेने मंगळवारी बिकानेरचे पोलीस अधीक्षक सवाई सिंह गोडारा यांची भेट घेऊन त्यांना झाला प्रकार कथन केला. त्यानंतर जयनारायण व्यास कॉलनी पोलीस ठाण्यात एफआयआर दाखल करण्यात आला. बलात्कार करणाऱ्यांपैकी दोघांना नावाने ओळखत असल्याचे या तरूणीने सांगितल्यावर पोलिसांनी तात्काळ कारवाई करत या आरोपींना अटक केली. सुभाष, राजू राम, भंवर लाल, मनोज कुमार, जुगल आणि मदन आदी सहा आरोपींना पकडण्यात आले असून हे सर्व आरोपी २० वर्षाचे असल्याचं पोलिसांनी 'टाइम्स ऑफ इंडिया'शी बोलताना सांगितलं.