अपत्यप्राप्तीसाठी मुलाचा बळी; आरोपी अटकेत

शाहजहानपूर (यूपी): अपत्यप्राप्तीसाठी एका मुलाचा बळी देण्याचा अघोरी प्रकार उत्तर प्रदेशातील शाहजहानपूरच्या जमुका गावात उघडकीस आल्याने परिसरात खळबळ माजली आहे. जमुका पोलिसांनी या प्रकरणी तीन लोकांना अटक केली आहे. आपल्याला अपत्यप्राप्ती व्हावी यासाठी एका तांत्रिकाच्या सांगण्यावरून आरोपी महिला धनदेवी हिने तिचा कथित प्रेमी आणि मामेभावासोबत एका मुलाचा बळी चढवला. शाम लालदास असे या बळी चढवलेल्या मुलाचे नाव आहे. तो १० वर्षांचा होता.

आरोपी महिला धनदेवी, तिचा प्रियकर सूरज आणि मामेभाऊ सुनील यांनी ५ डिसेंबरच्या संध्याकाळी शामचे अपहरण केले. त्यानंतर त्याला बळी दिले. हत्येनंतर या तिघांनी मुलाचे शव मंदिराच्या मागच्या बाजुला फेकून दिले, अशी माहिती पोलिसांनी दिली.

तांत्रिकाचा शोध सुरू

या घटनेबाबत पोलिसांनी दिलेल्या माहितीनुसार, धनदेवीचे लग्न पीलीभीत जिल्ह्यात झाले. लग्नाच्या सहा वर्षांनंतरही तिला मुलबाळ झाले नाही. म्हणून तिने आपला प्रियकर सूरजच्या मदतीने एका तांत्रिकाशी संपर्क साधला. तांत्रिकाच्या सल्ल्यानुसार धनदेवीने सूरज आणि सुनीलच्या मदतीने शामचे अपहरण केले आणि बळी दिले. या तिघांनाही अटक करण्यात आल्यानंतर आता युद्ध पातळीवर तांत्रिकाचा शोध सुरू असल्याचे पोलिसांनी सांगितले.