लैंगिक समानतेत बांगलादेशही आपल्या पुढे!

नवी दिल्ली : भारताची जागतिक लैंगिक समानता क्रमवारीत गेल्या वर्षीच्या तुलनेत चार स्थानांनी घसरण झाली आहे. भारताची क्रमवारी अगोदर १०८ होती, जी आता ११२ झाली आहे. वर्ल्ड इकॉनॉमिक फोरमकडून यावर्षीसाठी १५३ देशांची क्रमवारी जाहीर करण्यात आली आहे. या अहवालातील चिंताजनक बाब म्हणजे लैंगिक समानतेत बांगलादेश, नेपाळ आणि श्रीलंकाही भारतापेक्षा पुढे आहे. हे तिन्ही देश अनुक्रमे ५०, १०१ आणि १०२ व्या स्थानावर आहेत.

बांगलादेशने लैंगिक समानतेत मोठी आघाडी घेतली आहे. लग्झमबर्ग, अमेरिका आणि सिंगापूरपेक्षाही चांगली कामगिरी बांगलादेशने केली आहे. दक्षिण आशियात फक्त मालदीव आणि पाकिस्तान अनुक्रमे १२३ आणि १५१ व्या स्थानावर आहेत. हा अहवाल तयार करताना विविध निकष लक्षात घेतले जातात आणि त्या आधारावर क्रमवारीतील स्थान निश्चित केलं जातं. दक्षिण आशियाला लैंगिक समानतेचं लक्ष्य गाठण्यासाठी ७१ वर्षे लागतील, असंही निरीक्षण या अहवालात नोंदवण्यात आलं आहे.

जागतिक स्तरावर नियमित नोकऱ्यांच्या बाबतीत प्रत्येक तीन पुरुषांमागे सरासरी दोन महिला आहेत. तर भारतात प्रत्येक तीन पुरुषांमध्ये एक महिला असं हे प्रमाण आहे. भारतात एकच नोकरी आहे, ज्यात महिला पुरुषांपेक्षा पुढे आहेत आणि ही नोकरी आहे एचआर, म्हणजेच मानव संसाधन.

दरम्यान, या अहवालात एक विसंगतीही दिसून येते. भारताचं नेतृत्त्व एक महिला करत असल्यामुळे परिस्थिती सुधारली होती, असं या अहवालात म्हटलं आहे. पण गेल्या ३५ वर्षात राष्ट्रपती प्रतिभा पाटील यांचा अपवाद वगळला, तर दुसरी कोणतीही महिला राष्ट्रपती किंवा पंतप्रधान झालेली नाही. याशिवाय १५३ देशांमध्ये भारत एकमेव असा देश आहे, जिथे राजकीय लैंगिक असमानतेपेक्षा आर्थिक लैंगिक असमानता जास्त आहे. कंपनीच्या संचालकीय मंडळांमध्येही हे दिसून येतं. या मंडळांमध्ये फक्त १३.८ टक्के महिला असल्याचं अहवालात म्हटलं आहे.