प्रियांकावर माझा सर्वाधिक विश्वास!: राहुल

मटा ऑनलाइन वृत्त । हमीरपूर

'माझ्या बहिणीवर माझा इतर कोणाहीपेक्षा जास्त विश्वास आहे. तिनं सक्रिय राजकारणात उतरावं असं मलाही वाटतं. पण तो निर्णय सर्वस्वी तिचा असेल,' असं स्पष्ट मत काँग्रेसचे उपाध्यक्ष राहुल गांधी यांनी व्यक्त केलं आहे.

उत्तर प्रदेशातील आगामी निवडणुकांच्या पार्श्वभूमीवर राहुल गांधी यांनी 'टाइम्स ऑफ इंडिया'शी सविस्तर संवाद साधला. त्यावेळी त्यांनी प्रियांका गांधी यांच्या चर्चित राजकारण प्रवेशापासून ते नरेंद्र मोदी, मुलायमसिंह, मायावती यांच्यासह काँग्रेसच्या सद्य स्थितीवर मनमोकळं भाष्य केलं. काँग्रेसच्या लागोपाठच्या पराभवांच्या पार्श्वभूमीवर प्रियांका गांधी यांनी पक्षात सक्रिय व्हावे, यासाठी पक्षातूनच दबाव वाढत आहे. याबाबत विचारलेल्या प्रश्नावर राहुल गांधी म्हणाले, 'माझ्या बहिणीवर माझा पूर्ण विश्वास आहे. तिला सक्रिय राजकारणात बघायला मलाही आवडेल. पण तिची तशी इच्छा आहे की नाही? असेल तर तिनं कधी आणि कशी सुरुवात करावी याचा निर्णय तिनंच घ्यायचा आहे.'

मोदी म्हणजे 'सेल्फी मशीन'

पंतप्रधान नरेंद्र मोदी यांच्यावर राहुल गांधी यांनी जोरदार टीका केली. 'शेतकऱ्यांच्या प्रश्नावर मोदी अत्यंत असंवेदनशील आहेत. आरएसएसकडून त्यांनी खोटं बोलण्याचं प्रशिक्षण घेतलं आहे. पंतप्रधान मोदी म्हणजे सेल्फी घेणारी व खोटी वचनं देणारी मशीन आहे,' असा हल्लाही राहुल यांनी चढवला.

बसपशी आघाडी नाही!

यूपीच्या निवडणुकीत बहुजन समाज पक्षाशी आघाडीची शक्यता राहुल यांनी फेटाळून लावली. 'मायावती व मुलायम सिंह यांचं राजकीय अस्तित्व आता फार काळ टिकणार नाही,' असं भाकीतही त्यांनी वर्तवलं. 'फोडफोडीचं राजकारण हेच यूपीचं खरं दुखणं आहे. यूपीत बदल घडवण्याची ताकद काँग्रेसकडं आहे. लोकांना हा विश्वास आम्ही देऊ शकलो तर यूपीला सध्याच्या चिखलातून बाहेर काढता येईल,' असं ते म्हणाले.

प्रशांत किशोरकडे फक्त प्रचारमोहीम

निवडणूक व्यवस्थापन तज्ज्ञ मानल्या जाणाऱ्या प्रशांत किशोर यांना काँग्रेसमधून होणाऱ्या विरोधाबद्दल विचारलं असता राहुल म्हणाले, 'प्रशांत किशोर यांचा यूपी निवडणुकीतील सहभाग मर्यादित आहे. पक्षाची रणनीती राज्यातील नेतेच ठरवत आहेत. तिकीट वाटपाची काँग्रेसची एक पद्धत ठरलेली आहे. त्याच्याशी प्रशांत किशोर यांचा थेट संबंध नाही. प्रशांत फक्त प्रचार मोहीम राबवत आहेत.'