‘येत्या पाच वर्षांत ७० लाख रोजगार’

लखनौ : ‘येत्या पाच वर्षांत उत्तर प्रदेशात ७० लाख तरुणांसाठी रोजगार उपलब्ध करू,’ असे वक्तव्य उत्तर प्रदेशचे मुख्यमंत्री योगी आदित्यनाथ यांनी मंगळवारी केले; तसेच ‘एक जिल्हा एक उत्पादन’ योजनेद्वारे रोजगाराच्या अधिक संधी निर्माण करण्याचे सरकारचे प्रयोजन असेल, असे ते म्हणाले.

पहिल्या रोजगार परिषदेचे उद् घाटन केल्यानंतर योगी आदित्यनाथ म्हणाले, ‘लोकांनी उत्तर प्रदेशात गुंतवणुकीला प्राधान्य दिले आहे. त्यांच्या गुंतवणूक करण्याच्या उत्साहाकडे आणि क्षेत्राकडे सरकारचे लक्ष आहे. येत्या पाच वर्षांत एक कोटी बेरोजगारांपैकी ७० लाख जणांना रोजगार उपलब्ध करून देऊ.’

शेतीला रोजगाराशी जोडण्यात आल्याचे सांगून ते म्हणाले, ‘शेती हे खूप मोठे क्षेत्र असल्याने त्यामध्ये रोजगार निर्मितीची मोठी संधी आहे. ‘एक जिल्हा एक उत्पादन’ या धर्तीवर आपण राज्याचा विकास करू शकू. भादोहीमधील कार्पेट उद्योग, अलीगडमधील कुलुपाचा उद्योग, मुरादाबादमधील पितळ्याचा उद्योग, वाराणसीमधील साडी उद्योगाला आजवर प्रोत्साहन दिले गेले नाही. आपण ‘एक जिल्हा, एक उत्पादन’ असे का जोडू नये?’