बिगरसरकारी अधिकाऱ्यांना डच्चू

वृत्तसंस्था, लखनऊ

उत्तर प्रदेशचे नवनिर्वाचित मुख्यमंत्री योगी आदित्यनाथ यांनी सोमवारी कठोर निर्णय घेत सर्व बिगरसरकारी अधिकाऱ्यांच्या हकालपट्टीचे आदेश दिले. अखिलेश यादव सरकारने या सर्व अधिकाऱ्यांची नेमणूक केली होती.

उत्तर प्रदेश प्रशासनातील उच्चपदस्थ सरकारी अधिकाऱ्यांची आदित्यनाथ यांनी सोमवारी बैठक घेतली. या पहिल्याच बैठकीत त्यांनी बिगरसरकारी सल्लागार व विविध महामंडळांमधील अध्यक्ष, उपाध्यक्ष, सदस्य यांची तातडीने हकालपट्टी करण्याचे अधिकाऱ्यांना आदेश दिले. भाजपने निवडणुकीपूर्वी जारी केलेल्या संकल्प पत्राचा अभ्यास करून त्याची अंमलबजावणी करण्याची सूचनाही त्यांनी अधिकाऱ्यांना केली. उत्तर प्रदेश प्रशासनातील सर्व प्रशासकीय अधिकाऱ्यांनी १५ दिवसांत आपली स्थावरजंगम मालमत्ता जाहीर करावी, प्राप्तिकरासंबंधी माहिती द्यावी, असा आदेशही आदित्यनाथ यांनी दिला.

आदित्यनाथ यांनी नियमावलीद्वारे सर्व मंत्र्यांना व्हीआयपी संस्कृतीपासून दूर राहण्याचा सल्ला दिला आहे; तसेच कोणत्याही मंत्र्याने आपल्या वाहनावर लाल दिवा न लावण्याच्या सूचनाही त्यांनी केल्या आहेत.