युपीतील ७०० मुस्लिमांना RSS मध्ये जायचंय

नवभारत टाइम्स । अलाहाबाद

युपीतील मुस्लिम तरुणांसाठी राष्ट्रीय स्वयंसेवक संघ सध्या आकर्षणाचे केंद्र ठरला आहे. गेल्या दोन महिन्यात अलाहाबाद परिसरातील ७०० हून अधिक तरुणांनी संघाचे स्वयंसेवक होण्यासाठी संपर्क केला आहे. हा युपीचे मुख्यमंत्री योगी आदित्यनाथ यांच्या धडाकेबाज कामाचा परिणाम म्हणायचा की राष्ट्रीय स्वयंसेवक संघाच्या प्रचाराचे यश, अशी चर्चा आता यावरून रंगली आहे.

मुस्लिम समाजातील अनेक तरुणांनी संघ आणि संघाच्या कामकाजाबाबत माहितीसाठी संपर्क केला आहे. सध्या संघामध्ये ३०० हून अधिक मुस्लिम तरुण काम करत आहेत. यापैकी काही पूर्ण वेळ तर काही आपापल्या परिने योगदान देत आहेत. मोठ्या संख्यने व्यावसायिक आणि अनुभवी मुस्लिम तरुण संघामध्ये येण्यास इच्छुक आहेत, अशी माहिती संघाच्या स्वयंसेवकांनी दिली.

निम-शहरी आणि ग्रामीण क्षेत्रातील प्रत्येक समाजात पोहोचण्याचा प्रयत्न संघाच्या प्रयाग विभागामार्फत केला जातोय. सदस्यांच्या वाढत्या संख्येसोबतच गेल्या तीन वर्षात संघाच्या शाखांची ताकद वाढली आणि त्या बळकट झाल्या आहेत. खास करून महिलाही शाखांमध्ये सहभागी होण्यासाठी पुढे येत आहेत. मुस्लिम समाजाचे लोकही संघात येण्यास इच्छुक आहेत आणि सक्रियपणे काम करण्याची त्यांची तयारी आहे. काही मुस्लिम तरुण तर नियमितपणे शाखांच्या कार्यक्रमांमध्ये हजेरी लावत आहेत, अशी माहिती विभाग प्रचारक मनोजकुमार यांनी दिली.