एका सेकंदात डाऊनलोड करा ३ सिनेमे

नेटकऱ्यांसाठी आणि चित्रपटप्रेमींसाठी एक आनंदाची बातमी आहे. आता केवळ एका सेकंदात तुम्हाला तीन चित्रपट डाऊनलोड करणं शक्य होणार आहे. येत्या मे महिन्यापासून भारतातील दूरसंचार क्षेत्रात हे सर्वात मोठे परिवर्तन होत असून त्याअंतर्गत एका सेकंदात एक-एक जीबीचे तीन चित्रपट डाऊनलोड करणं शक्य होणार आहे. सोबतच केबल, डिश आणि इंटरनेटच्या जाळ्यातूनही सुटका होण्याचीही शक्यता आहे. हे सगळं शक्य होतंय ते, जीसॅट-११ या उपग्रहाच्या प्रक्षेपणामुळे!

इस्त्रोच्या अहमदाबाद येथील अंतराळ अनुप्रयोग केंद्राद्वारे विकसित करण्यात आलेला हा उपग्रह फ्रान्सची अंतराळ संस्था 'एरियन' येथून प्रक्षेपित होत आहे. या उपग्रहाचे वजन ५७०० किलो असून भारतातील आतापर्यंतचा हा सर्वात वजनी उपग्रह आहे. एवढ्या वजनाचा उपग्रह प्रक्षेपित करण्याची क्षमता सध्या भारताकडे नसल्यामुळे इस्रोने हा उपग्रह फ्रान्सकडे पाठविला आहे. उपग्रहाच्या प्रक्षेपणासाठी 'एरियन'सोबत करार करण्यात आला आहे.

या उपग्रहाच्या मदतीने १४ जीबी प्रति सेकंद इतक्या वेगाने डाटा पाठविणं शक्य होणार आहे. सध्या भारतात डाटा पाठविण्याचा हा वेग काही एमबी प्रति सेकंद एवढाच आहे. या उपग्रहाच्यामुळे देशाच्या कोणत्याही भागात इंटरनेट वापरणं खूप सहज होणार आहे. टीव्ही किंवा इंटरनेटचा वापर करण्यासाठी या उपग्रहाचे सिग्नल्स एका डोंगलद्वारे मिळविता येऊ शकतात. जीसॅट -११ साठी सरकारने २००९ मध्येच मंजुरी दिली होती.