अमरावती (आंध्र प्रदेश) : आंध्र प्रदेशातील प्रमुख विरोधी पक्ष असलेल्या वायएसआर काँग्रेसने रविवारी लोकसभा आणि विधानसभा निवडणुकीसाठी उमेदवारांची यादी जाहीर केली. राज्यातील लोकसभेच्या २५, तर विधानसभेच्या १७५ जागांवरील उमेदवार या पक्षाने जाहीर केले आहेत. २०१४च्या निवडणुकीतील केवळ दोन उमेदवारांना आता संधी देण्यात आली आहे, तर उर्वरीत २३ जागांवर नवीन चेहरे देण्यात आले आहेत. वायएसआर काँग्रेसचे प्रमुख वाय. एस. जगनमोहन रेड्डी यांनी ही उमेदवार यादी जाहीर केली. तत्पूर्वी त्यांनी त्यांचे दिवंगत वडील आणि माजी मुख्यमंत्री वाय. एस. राजशेखर रेड्डी यांना श्रद्धांजली अर्पण केली. आंध्र प्रदेशातील २५ लोकसभा मतदारसंघांपैकी सात मतदारसंघ नागरिकांच्या मागास वर्गासाठी राखीव आहेत. चार मतदारसंघ अनुसूचित जातींसाठी, तर एक मतदारसंघ अनुसूचित जमातीसाठी राखीव आहेत. पक्षाने विधानसभेला उमेदवारी दिलेल्यांपैकी ४१ जण मागासवर्गातील असून, पाच जण मुस्लिम उमेदवार आहेत, असे रेड्डी यांनी सांगितले आहे.
वायएसआर काँग्रेसचे उमेदवार जाहीर
आंध्र प्रदेशातील प्रमुख विरोधी पक्ष असलेल्या वायएसआर काँग्रेसने रविवारी लोकसभा आणि विधानसभा निवडणुकीसाठी उमेदवारांची यादी जाहीर केली...
MT 18 Mar 2019, 4:00 am