महिलेच्या डोळ्यातून २७ कॉन्टॅक्ट लेन्स काढल्या

मटा ऑनलाइन वृत्त । लंडन

आरोग्य आणि शरिराच्या बाबतीत नेहमीच सावधानता बाळगली पाहिजे. नाही तर छोट्याश्या चुकीमुळे होत्याचं नव्हतं होऊ शकतं. ब्रिटनमध्ये एका महिलेला असाच अनुभव आला आहे. मोतिबिंदू शस्त्रक्रियेसाठी आलेल्या या ६७ वर्षीय महिलेच्या डोळ्यातून डॉक्टरांनी तब्बल २७ कॉन्टॅक्ट लेन्स काढल्या. या लेन्स एकमेकींवर चिकटून बसल्या होत्या. अशी शस्त्रक्रिया प्रथमच केल्याचे डॉक्टरांनी सांगितलं.

ही घटना नोव्हेंबर २०१६ ची असून ब्रिटनच्या एका मेडिकल जर्नलमधून उघडकीस आली आहे. ही महिला नष्ट करता येणाऱ्या लेन्स वापरत होती. सतत एक महिना लेन्स वापरल्यानंतर त्या फेकाव्या लागतात. सदर महिला ३० वर्षाहून अधिक काळ या लेन्सचा वापर करत होती. या काळात ती अनेकदा डोळ्यातून लेन्स काढायला विसरली आणि लेन्स डोळ्यातच चिटकून राहिल्या.

बऱ्याचदा डोळे दुखायचे. पण लेन्स डोळ्यात राहिल्याने डोळे दुखत असावेत असं कधी मनात आलं नाही, असं या महिलेनं डॉक्टरांना सांगितलं. जेंव्हा ती मोतिबिंदू शस्त्रक्रियेसाठी डॉक्टरांकडे आली तेंव्हा तिच्या डोळ्यात २७ लेन्स आढळून आल्या. त्यामुळे डॉक्टरांनी या कॉन्टॅक्ट लेन्स ताबडतोब काढल्या असल्याचं मेडिकल जर्नलमध्ये नमूद करण्यात आलंय.