कतारमध्ये सैराट आणि दोन स्पेशलची धूम!

रोशन दलवाई । दोहा (कतार)

कतारमध्ये राहणाऱ्या मराठी लोकांना आपल्या मायभूमीतील कार्यक्रमांचा आनंद घेता यावा म्हणून कतारच्या महाराष्ट्र मंडळाने एकापाठोपाठ दोन अप्रतिम कार्यक्रमांचे आयोजन केले होते. या कार्यक्रमाला मंडळातील सर्व सदस्यांचा चांगला प्रतिसाद मिळाल्याचे दिसत होते.

२२ एप्रिल रोजी चैत्रमास २०१६ च्या यशस्वी आयोजनानंतर लगेचच शुक्रवारी, २९ एप्रिल रोजी सुटीच्या दिवशी ह. मो. मराठे यांच्या मूळ संकल्पनेवर आधारित आणि क्षितीज पटवर्धन दिग्दर्शित 'दोन स्पेशल' या नाटकाचे आयोजन करण्यात आले. तर ६ मे रोजी 'सैराट' या चित्रपट दाखवण्यात आला.

'दोन स्पेशल' या नाटकातील प्रमुख कलाकार अभिनेते जितेंद्र जोशी आणि अभिनेत्री गिरीजा ओक यांचा उत्कृष्ट अभिनय तसेच त्यांना आपल्या चुणचुणीत संवाद फेकीने साथ देणाऱ्या रोहित हळदीकर यांचे प्रेक्षकांनी कौतुक केले. नाटकाचा प्रयोग बहारदार झाला, तसेच चांगले नाटक पाहिल्याची प्रतिक्रिया मंडळाच्या अनेक सभासदांनी व्यक्त केली.

'सैराट' चित्रपटाच्या प्रदर्शनाचे मंडळाकडून जाहीर करण्यात आल्यानंतर आगाऊ तिकीट विक्रीसाठी एकच झुंबड उडाली आणि संपूर्ण सिनेमा हॉल हाउसफुल्ल झाला. कतारमध्येही सैराट प्रेक्षकांच्या पसंतीस उतरला. ‘जल्लोष २०१६’ हा कार्यक्रम २७ मे रोजी सादर करण्यात येणार आहे.