म. टा. खास प्रतिनिधी, मुंबई
महाराष्ट्राची परंपरा, खाद्यसंस्कृती तसेच कला यांचे दर्शन अमेरिकेतील डॅलस शहरवासियांना गुरुवारी घडले. निमित्त होते बृहन्महाराष्ट्र मंडळाच्या (बीएमएम) १९व्या अधिवेशनाचे. यंदाचे अधिवेशन डॅलसमधील के बेली हचिसन कन्व्हेन्शन सेंटरमध्ये आयोजित करण्यात आले आहे. १४ जुलैपर्यंत हे अधिवेशन चालणार आहे.
टेक्सासच्या भव्यतेला साजेसे हे अधिवेशन आहे. 'सूर गुंजती अभिनवतेचे, फुलवित नाते परंपरेचे' या घोषवाक्याला धरून अधिवेशनाची आखणी करण्यात आली आहे, अशी माहिती अधिवेशनाचे प्रमुख आयोजक दिलीप राणे यांनी दिली.
३८ वर्षांची परंपरा लाभलेले बृहन्महाराष्ट्र मंडळ हे जगातील महाराष्ट्राबाहेरचे सर्वात मोठे मराठी मंडळ आहे. उत्तर अमेरिकेतील तसेच जगातील इतर भागातून जवळपास चार हजार मराठी लोक येथे सहभागी होत आहेत. पद्मभूषण ज्येष्ठराज जोशी, डॉ. रवीन थत्ते, डॉ. अरुणा ढेरे, सुबोध भावे, बीव्हीजीचे हनुमंत गायकवाड इत्यादी मान्यवर या अधिवेशनाला उपस्थित राहणार आहेत.
अधिवेशनादरम्यान आषाढी एकादशीचा योग आला आहे. त्यामुळे अधिवेशनात पंढरपूरच्या मंदिराची प्रतिकृती, कीर्तन, पालखी, लेझीम, ढोलताशे, तसेच उपवासाचे चविष्ट पदार्थ असे खास नियोजन करण्यात आले आहे. पैठणीचे रंगीबेरंगी प्रकार, वेगवेगळे अस्सल मराठी दागिने, लेझीमचा किणकिणाट याने डॅलस शहर दुमदुमत आहे. तीनशेपेक्षा अधिक स्वयंसेवक अधिवेशन यशस्वी करण्यासाठी झटत आहेत.
'उत्तररंग' व 'बिझनेस कॉन्फरन्स' या कार्यक्रमांनी अधिवेशनाची सुरुवात झाली. त्यानंतर झालेल्या उदघाटन सोहळ्यात अमेरिकेतील व भारतातून आलेल्या मराठीजनांनी विविध कार्यक्रम सादर केले. अधिवेशनादरम्यान, महाराष्ट्रातील व अमेरिकेतील मराठी लोकांसाठी स्वयंसेवी संस्थांची एनजीओ परिषद आयोजित करण्यात आली आहे. यामध्ये पाणी फाऊंडेशन, मराठी विज्ञान परिषद आणि हॅलो मेडिकल फाऊंडेशन यांच्यासह अन्य स्वयंसेवी संस्था भाग घेणार आहेत. अदिवेशन काळात यंदा प्रथमच विवाहेच्छू वधूवर स्नेहभेटीचेही आयोजनही केले आहे.
..
कार्यक्रमांची रेलचेल
- सारेगम, शास्त्रीय संगीत स्पर्धा, ढोल ताशा व लिखाण स्पर्धा, कवितांजली, फोटोग्राफी व पेंटिंग्ज अशा विविध कलागुणांचे प्रदर्शनही अधिवेशनात आहे.
- महाराष्ट्राची खाद्यसंस्कृती इथे आवर्जून पाळली जाणार आहे. नारळी भात, पाकातले चिरोटे, खानदेशी फुणके, मोदक असे पदार्थ दरदिवशी उपस्थितांना चाखता येतील.
- डॅलस डाउनटाऊनमध्ये 'गौरवयात्रेचे' आयोजन.