वृत्तसंस्था, न्यूयॉर्क
भारत आणि पॅसिफिक महासागरांतील विकसनशील देशांची बुधवारी परिषद झाली. या छोट्या देशांमध्ये सौरऊर्जा, अपारंपरिक ऊर्जा आणि हवामानविषयक प्रकल्पांसाठी १५ कोटी डॉलरपर्यंत कर्ज देणार असल्याचे पंतप्रधान नरेंद्र मोदी यांनी जाहीर केले. या शिवाय, या देशांमध्ये त्यांच्या प्राधान्यानुसार उच्चपरिणाम विकास प्रकल्पांसाठी १.२ कोटी डॉलरची मदत देणार असल्याचेही त्यांनी सांगितले. संयुक्त राष्ट्रांच्या आमसभेवेळी ही परिषद झाली असून, आमसभेच्या काळात प्रथमच या देशांची परिषद झाली. या परिषदेला फिजी, किरीबाती, मार्शल बेटे, मायक्रोनेशिया, नौरू, पलाऊ, पपुआ न्यू गिनी, सामोआ, सोलोमन बेटे, टोंगा या बेटांचे प्रतिनिधी उपस्थित होते. 'सब का साथ, सब का विकास या तत्त्वावर ही मदत करत आहोत,' असे मोदी यांनी सांगितले. 'पॅसिफिक महासागरातील या देशांची मूल्ये आणि आकांक्षा समान आहेत. याशिवाय, असमानता कमी करण्यासाठी आणि सबलीकरणासाठी योगदान देण्यासाठी विकासाची धोरणे आखण्याची गरज आहे. या देशांची लक्ष्ये गाठण्यासाठी विकासशील आणि तांत्रिक सहाय देण्याची गरज आहे,' असे मोदी यांनी या वेळी सांगितले.
उर्जेच्या पर्यायी स्रोतांविषयीच्या अनुभवांचे आदान-प्रदान करण्यासाठी भारत तयार आहे, असे सांगतानाच आंतरराष्ट्रीय सौर आघाडीमध्ये या विभागातील अनेक देश सहभागी झाल्याबद्दल मोदी यांनी समाधानही व्यक्त केले.