लाहोरमध्ये बॉम्बस्फोटात १० ठार

मटा ऑनलाइन वृत्त । लाहोर

लाहोरमधील मॉल रोड भागात औषध विक्रेत्यांची निदर्शनं सुरू असतानाच बॉम्बस्फोट घडवण्यात आला असून त्यात किमान १० जण ठार तर ६० हून अधिक लोक जखमी झाल्याची माहिती पाकिस्तानातील माध्यमांनी दिली आहे. मृतांचा आकडा वाढण्याची भीती व्यक्त करण्यात येत आहे.

बॉम्बस्फोटात पोलिसांच्या वाहतूक विभागाचे उपमहानिरीक्षक कॅप्टन मुबीन आणि वरिष्ठ पोलीस अधीक्षक झाहीद मेहमूद यांना आपला जीव गमवावा लागला असून हा बॉम्बस्फोट आत्मघाती हल्ला असल्याचे पंजाब प्रांताचे कायदा मंत्री राणा सनाउद्दीन यांनी म्हटले आहे.

मोटारसायकलवरून हल्लेखोराने गर्दीत घुसून हा बॉम्बस्फोट घडवल्याची प्राथमिक माहिती मिळत आहे.

दरम्यान, तालिबानने या हल्ल्याची जबाबदारी स्वीकारली आहे.