भारताला पाकने २६/११च्या तपासात मदत करावी!: अमेरिका

मटा ऑनलाइन वृत्त । वॉशिंग्टन

मुंबईत २६ नोव्हेंबर २००८ रोजी झालेल्या दहशतवादी हल्ल्याचा तपास करण्यासाठी भारताला मदत करा अशा शब्दात अमेरिकेने पाकिस्तानला सूचनावजा आदेश दिला आहे. आतापर्यंत हाती आलेल्या पुराव्यांमधून २६/११च्या दहशतवादी हल्ल्याचे सूत्रसंचालक पाकिस्तानमध्येच बसले होते हे उघड झाले आहे, त्यामुळे तपासाकरिता पाकिस्तानने भारताला मदत करावी, अशी अमेरिकेची नवी भूमिका आहे.

आम्ही पाकिस्तान सरकारच्या संपर्कात आहोत आणि त्यांना २६/११च्या तपासकामात भारताला मदत करण्यास सांगितले आहे, अशी माहिती अमेरिकेच्या परराष्ट्र मंत्रालयाचे उपप्रवक्ता मार्क टोनर यांनी दिली. दहशतवाद्यांनी मुंबईत मोठा घातपात केला. या हल्ल्याच्या पीडितांना न्याय मिळायला हवा, असेही मार्क म्हणाले.

पाकिस्तानमधून सुरू असलेल्या सर्व दहशतवादी कारवाया थांबायला हव्यात. पाकने दहशतवाद्यांना कोणत्याही परिस्थितीत प्रत्यक्ष किंवा अप्रत्यक्ष मदत आणि पाठिंबा देऊ नये, अशी अमेरिकेची भूमिका आहे. आम्ही आमचे म्हणणे पाक सरकारला सांगितले आहे, असेही मार्क म्हणाले. दहशतावादाला कोणत्याही पद्धतीने मदत करणे हे धोक्याचे आहे. हा धोका नको असल्यास दहशतवादाला साथ देऊ नका असे आम्ही आधीही सांगितले होते आणि आता पुन्हा सांगितले असल्याचे मार्क म्हणाले.

पाकिस्तानमध्ये २६/११ प्रकरणी एका ददहशतवादविरोधी कोर्टात खटला सुरू आहे. या खटल्यात झकी-ऊर-रेहमान लखवीसह ७ जणांना आरोपी करण्यात आले आहे. आरोपींवर विदेशींसह १६६ जणांच्या हत्येचा आरोप आहे. या प्रकरणात सुनावणीपेक्षा पुढची तारीख देण्याचे प्रमाणच जास्त आहे. वारंवार नवी कारणे काढून सुनावणी पुढे ढकलली जात आहे. अलिकडेच पाकने भारतीय कोर्टात सादर झालेल्या साक्षीदारांना पाकच्या कोर्टातही प्रत्यक्ष सादर करण्याची मागणी केली. भारताकडून सुरक्षेच्या कारणास्तव ही मागणी अद्याप मान्य झालेली नाही. या पार्श्वभूमीवर आता अमेरिकेकडूनच पाकवर २६/११ प्रकरणी वेगाने कारवाई करण्यासाठी दबाव वाढला आहे. दरम्यान, अमेरिकेच्या वक्तव्यावर पाकिस्तानने अद्याप अधिकृत प्रतिक्रिया दिलेली नाही.