कार बाँबच्या स्फोटात लीबियात २७ ठार

वृत्तसंस्था, बेंगझाई

मशिदीतून बाहेर पडणाऱ्या लोकांमध्ये दोन मोटारी घुसवून घडविलेल्या बॉम्बस्फोटात बेंगझाई शहरात बुधवारी २७ जण ठार झाले. या स्फोटात ३० हून अधिक जण जखमी झाले आहेत. या हल्ल्याची जबाबदारी अद्याप कोणीही स्वीकारलेली नाही.

लष्कराचे प्रवक्ते कॅप्टन तारेक अल्खर्राज यांनी सांगितले, की काल सायंकाळी साडेआठच्या सुमारास सलमानी भागात प्रथम मोटार घुसवून बॉम्बस्फोट घडविण्यात आला. ते पाहून अनेक रहिवासी मदतीला धावले. रुग्णवाहिकाही तेथे पोचल्या होत्या. त्यानंतर अर्ध्या तासांत या गर्दीत दुसरी मोटार घुसवून बॉम्बस्फोट घडविण्यात आला. यात आतापर्यंत २७जण ठार झाले असून, ३२ जण जखमी झाले आहेत. संयुक्त राष्ट्रसंघाने या हल्ल्याचा निषेध केला आहे.