४ वर्षांच्या मुलानं 'असा' वाचवला आईचा जीव

मटा ऑनलाइन वृत्त । लंडन

लहान मुलांच्या हाती मोबाइल देणं कसं चुकीचं आहे, त्याचे काय दुष्परिणाम होतात, हे आपण नेहमीच ऐकतो-वाचतो. पण, मोबाइल वापराबद्दलची माहिती असल्यानंच लंडनमधील एक चार वर्षाचा चिमुरडा आपल्या आईचा जीव वाचवू शकलाय. या टिल्ल्यानं दाखवलेलं प्रसंगावधान खरंच चकित करणारं आहे.

त्याचं झालं असं की, ४ वर्षांचा रोमान आपला जुळा भाऊ आणि धाकट्या भावासोबत घरी असताना त्यांची आई अचानक घसरली आणि बेशुद्धच पडली. रोमान आईजवळ जाऊन तिला जागं करण्याचा प्रयत्न करू लागला. पण तिच्याकडून काहीच प्रतिसाद नव्हता. तो घाबरला, पण डगमगला नाही. त्यानं बेशुद्ध पडलेल्या आईच्या अंगठ्याने तिचा आयफोन अनलॉक केला आणि 'सीरी' अॅपद्वारे लंडनमधील इमर्जन्सी नंबर ९९९ वर फोन लावला. माझ्या आईचा मृत्यू झाला आहे, ती डोळेही उघडत नाहीए आणि श्वासही घेत नाहीए, असं त्यानं पलीकडच्या व्यक्तीला सांगितलं.

त्यानंतर, पुढच्या १३ मिनिटांत अॅम्ब्युलन्स आणि पोलीस रोमानच्या घरी पोहोचले. डॉक्टरांनी त्याच्या आईला तपासलं, तेव्हा ती बेशुद्ध असल्याचं स्पष्ट झालं. त्यांनी प्राथमिक उपचार करून तिला हॉस्पिटलमध्ये हलवलं आणि आता ती पूर्णपणे बरी झाली आहे. रोमानने दाखवलेल्या प्रसंगावधानाचं तिला खूपच कौतुक वाटतं.

या घटनेतून आपल्याकडच्या पालक मंडळींनाही एक बोध घेता येऊ शकतो. मुलांना गॅझेट्स वापरायला द्यायची की नाही, किती वेळ द्यायची, हे ज्याने-त्याने ठरवावं. पण या गॅझेट्सचा उपयोग संकटसमयी कसा करता येऊ शकतो, याचं प्रशिक्षण त्यांना देऊन ठेवलेलं बरं. त्याचा कधी, कसा उपयोग होईल सांगता येत नाही.