शाळेने दिला 'सुसाइड नोट' लिहायचा होमवर्क!

मटा ऑनलाइन वृत्त । लंडन

ब्रिटनच्या एका शाळेत विद्यार्थ्यांना शिक्षकांनी चक्क 'सुसाइड नोट' (आत्महत्येपूर्वीची चिठ्ठी) लिहायला लावली. इंग्रजी विषयाचा हा 'होमवर्क' बघून या मुलांच्या पालकांना झीट येणं बाकी होतं. हे ६० विद्यार्थी शेक्सपिअरचं प्रसिद्ध नाटक 'मॅकबेथ' चा अभ्यास करणाऱ्या गटातले होते.

या 'सुसाइड नोट' प्रकरणानंतर वाद वाढल्यावर किडब्रुक येथील थॉमस टेलिस स्कूलने माफी मागितली आहे. ज्या विद्यार्थ्यांना सुसाइड नोट लिहायला सांगितली, त्यापैकी काही विद्यार्थी असेही होते, ज्यांच्या मित्रांनी आत्महत्या केली होती. एका विद्यार्थिनीच्या तीन मित्रांनी आत्महत्या केली आहे. शाळेने सुसाइड नोट लिहायला सांगितली तेव्हा ती या मित्रांची आठवण काढून दु:खी झाली. तिच्या आईने या 'सुसाइट नोट' प्रकाराबद्दल शाळेत तक्रार केली.

एका पालकाने तेथील स्थानिक वृत्तपत्र न्यूज शॉपरला दिलेल्या माहितीनुसार, अल्पवयीन मुलांना असा होमवर्क देणं अघोरी आहे. यापूर्वीच्या २ वर्गाच्या मुलांनी हा होमवर्क केला आहे. एका संतापलेल्या पालकांनी तर अशी सुसाइड नोट लिहिणाऱ्या शिक्षकाला पुन्हा प्रशिक्षणासाठी पाठवण्याचा सल्ला दिला. शाळेच्या मुख्याध्यापकांनी झाल्या प्रकाराबद्दल माफी मागत पुन्हा अशा प्रकारचं प्रोजेक्ट मुलांना देण्यात येणार नाही, याची काळजी घेतली जाईल, अशी हमी दिली आहे.