काबुल, अफगाणिस्तान :
हैबतुल्ला अखुंदजादाबद्दल इतकी उत्सुकता निर्माण होण्याचं कारण म्हणजे दीर्घकाळापासून अखुंदजादा जनतेसमोर आलेला नाही. इतकंच काय तर तालिबाननं सत्ता स्थापन केल्यानंतरही अखुंदजादाचा चेहरा उघडपणे पाहायला मिळालेला नाही.
नाही म्हणायला काही दिवसांपूर्वी समोर आलेल्या एका व्हिडिओत त्याच्या उपस्थितीचा दावा करण्यात आला होता. परंतु, अखुंदजादा जिवंत असून तो कंदहारमध्ये आहे, असा दावा एका तालिबानी प्रवक्त्याकडून करण्यात आला होता.
यानंतर दोन महिन्यांनी ३० ऑक्टोबर रोजी अखुंदजादा दक्षिण शहराच्या एका मदरशात पाहायला मिळाल्याचं आणि इथल्या लोकांना अखुंदजादानं संबोधित केल्याच्या बातम्या पसरवण्यात आल्या. मदरसाचे सुरक्षाप्रमुख मासुम शकरुल्लाह यांनी अखुंदजादा इथं तीन सुरक्षारक्षकांसोबत आल्याचं सांगतिलं. मदरशातील एका विद्यार्थ्यानं मात्र 'आपण एवढे आनंदी होतो की अखुंदजादाचा चेहराच पाहणं विसरलो' असं अजब उत्तर दिलं होतं.
कार्यक्रम स्थळावर कुणालाही मोबाईल किंवा साऊंड रेकॉर्डर घेऊन जाण्याची परवानगी नव्हती. मात्र, कार्यक्रमानंतर तालिबान अधिकाऱ्यांकडून एक ऑडिओ जारी करण्यात आला. १० मिनिटांच्या या ऑडिओत अखुंदजादाचं हकीमिया मदरशातील भाषणाचा काही भाग असल्याचा दावा करण्यात आला.
आपल्या लढवय्या तरुणांशी आणि 'बहादूर सैनिकांशी' संवाद साधण्यासाठी अखुंदजादानं दारुल उलूम हकीमा मदरशाचा दौरा केल्याचा दावा तालिबानकडून सोशल मीडिया अकाऊंटसवर प्रसारित ऑडिओ संदेशात करण्यात आला.
मात्र, अफगाणिस्तानवर वर्चस्व मिळवल्यानंतर आणि सत्ताही स्थापन केल्यानंतर अद्याप हैबतुल्ला अखुंदजादा अद्याप खुलेपणानं जगासमोर का आला नाही? या प्रश्नाचं उत्तर मात्र गुलदस्त्यातच आहे.