India US relations'बायडन यांच्यामुळे भारत-अमेरिका संबंधावर परिणाम नाहीच!'

वॉशिंग्टन: 'अमेरिकेचे नवनिर्वाचित अध्यक्ष जो बायडन भारत-अमेरिका संबंध मजबूत करण्याची प्रक्रिया पुढे नेतील,' असे अमेरिकेतील थिँक टँक; तसेच भारतीय-अमेरिकी तज्ज्ञांनी म्हटले आहे. 'बायडन प्रशासन भारतासाठी सकारात्मक असेल,' असे 'सेंटर फॉर स्ट्रॅटेजिक अँड इंटरनॅशनल स्टडीज'चे री रोसॉ यांनी सांगितले. दोन्ही देशांतील सहकार्याच्या विविध सकारात्मक क्षेत्रांपैकी संरक्षण क्षेत्र महत्त्वाचे असेल, असेही रोसॉ म्हणाले. 'रशियाकडून संरक्षण खरेदीवरून भारतावरील संभाव्य निर्बंधांचा मुद्दा बायडन प्रशासन कशा पद्धतीने हाताळते; तसेच भारतातील सामाजिक प्रश्नांबद्दल अमेरिकेने मोठ्या प्रमाणात चिंता व्यक्त केली, तर त्यामुळे किती अडथळे निर्माण होतात, हे दोन कळीचे मुद्दे भारत-अमेरिका संबंधांना आकार देतील,' असे मत रोसॉ यांनी व्यक्त केले.

इराणशी संबंध; तसेच अपारंपरिक ऊर्जा सहकार्य या मुद्द्यांवरून भारतावर बायडन यांच्या कार्यकाळात कमी दबाव असेल, असेही त्यांनी सांगितले. मात्र, दोन्ही देशांमधील व्यापारी ताण कायम राहील, असेही रोसॉ म्हणाले. 'कार्नेजी एन्डोवमेंट फॉर इंटरनॅशनल पीस थिंक टँक'मधील धोरणात्मक व्यवहारांसंदर्भातील टाटा अध्यासनाचे अॅशले जे. टेलिस म्हणाले, 'भारत-अमेरिका संबंध मजबूत करण्याची प्रक्रिया बायडन पुढे नेतील यात शंका नाही.' अमेरिकेतील समस्या सोडवणे; तसेच जगात अमेरिकी नेतृत्व प्रस्थापित करण्यातच बायडन व्यग्र राहतील. बाकी सगळे नंतर येईल, असेही टेलिस म्हणाले.

वाचा: ट्रम्प बायडन यांच्या अडचणी वाढवणार? चीनविरोधात घेणार मोठा निर्णय!वाचा: ट्रम्प यांनी पराभव मान्य न केल्यास काय होणार? 'हे' आहेत पर्याय

बायडन यांचे जुने मित्र असलेले नॉर्थ कॅरोलिना येथील रहिवासी स्वदेश चॅटर्जी म्हणाले, '२१व्या शतकात भारत अमेरिकेचा महान मित्र; तसेच चांगला सहकारी असावा, असे बायडन यांना वाटते.' भारत-अमेरिका संबंध व्यक्तीसापेक्ष राहिलेले नाहीत. दोन्ही देशांतील संबंध मजबूत असून, पुढील काळात अधिक चांगले होतील, असेही चॅटर्जी म्हणाले. भारत-अमेरिका अणुकरार होण्यामध्ये बायडन यांची महत्त्वाची भूमिका होती. बायडन त्या वेळी सिनेटच्या परराष्ट्र संबंध समितीचे अध्यक्ष होते. त्या वेळी रिपब्लिकन पक्षाचे प्रशासन होते. मात्र, डेमोक्रॅट म्हणून बायडन यांनी महत्त्वाची भूमिका बजावली होती. कारण भारत-अमेरिका संबंध मजबूत असण्यावर त्यांचा विश्वास आहे, याकडेही चॅटर्जी यांनी लक्ष वेधले. दरम्यान, अमेरिका आणि भारताला बायडन अधिक जवळ आणतील, असे बायडन यांचे समर्थक अजय जैन भुतोरिया म्हणाले.

वाचा: ट्रम्प यांनी हद्द केली! चार वर्षांत २० हजारदा खोटं बोलले

वाचा: सत्तेची सुत्रे हाती घेतल्यानंतर बायडन देणार भारतीयांना भेट

'ट्रम्प यांनी निकाल स्वीकारावा'

डोनाल्ड ट्रम्प यांनी निवडणुकीचा निकाल स्वीकारावा, असे आवाहन ट्रम्प याचे जावई आणि त्यांचे वरिष्ठ सल्लागार जारेड कुशनर यांनी केल्याचे वृत्त आहे. जो बायडन अमेरिकेचे ४६वे अध्यक्ष झाल्याचे वृत्त अमेरिकी प्रसारमाध्यमांनी दिल्यानंतर ट्रम्प यांच्या प्रचारमोहिमेने प्रसिद्धीपत्रक जारी केले होते. चुकीच्या पद्धतीने बायडन यांना विजयी झाल्याचे दाखवण्यात येत आहे, असे ट्रम्प यांच्या पत्रकात म्हटले आहे. त्या पार्श्वभूमीवर कुशनर यांनी ट्रम्प यांना निवडणुकीचा निकाल स्वीकारण्याचे आवाहन केले आहे. दोन अज्ञात सूत्रांच्या हवाल्याने 'सीएनएन'ने याबाबत वृत्त दिले आहे. निवडणूक निकाल स्वीकारण्याचे आव्हान ट्रम्प यांना केल्याचे कुशनर यांनी इतरांना सांगितल्याचे यात म्हटले आहे.