हिजबुल मुजाहिद्दीनवर अमेरिकेची बंदी

मटा ऑनलाइन वृत्त । वॉशिंग्टन

पाकिस्तानमधील दहशतवादी संघटना हिजबुल मुजाहिद्दीनवर बंदी घालत अमेरिकेने ही संघटना आंतरराष्ट्रीय दहशतवादी संघटना असल्याचे घोषित केले आहे. यामुळे दहशतवादाच्या मुद्द्यावर पाकिस्तानचा पर्दाफाश करण्याच्या भारताच्या प्रयत्नांचे हे मोठे यश मानले जात आहे. तर काश्मीरमध्ये दहशतवादाला प्रोत्साहन देणाऱ्या पाकिस्तानला हा जबर झटका बसला आहे.

पाकिस्तानमधील हिजबुल मुजाहिद्दीन संघटनेवर बंदी घालण्यात आली आहे. याचा अर्थ म्हणजे दहशतवादी संघटनेटची अमेरिकेतील सर्व संपप्ती केली जाईल. तसंच या संघटनेशी नागरीकांनी कुठलाही संबंध ठेवू नये, अशी सूचना अमेरिकेच्या सरकारकडून आपल्या नागरीकांना करण्यात येईल.

अमेरिकेचे अध्यक्ष डोनाल्ड ट्रम्प आणि पंतप्रधान नरेंद्र मोदी यांची जूनमध्ये भेट झाली होती. या भेटीपूर्वी अमेरिकेच्या परराष्ट्र खात्याने हिजबुल मुजाहिद्दीनचा म्होरक्या सय्यद सलाउद्दीन याचा समावेश आंतरराष्ट्रीय दहशवाद्यांच्या यादीत केला होता. यानंतर दहशतवादी सलाउद्दीनने हा निर्णय धुडकावून लावत अमेरिकेला मूर्ख म्हटले होते. त्यावेळी पाकिस्ताननेही अमेरिकेचा विरोध करत सय्यद सलाउद्दीनचा बचाव केला होता.