वृत्तसंस्था, तेहरान
इराणच्या क्षेपणास्त्र हल्ल्यामध्ये युक्रेनचे प्रवासी विमान पडल्याच्या घटनेनंतर, या हल्ल्यासाठी कारणीभूत असणाऱ्या काही जणांना अटक करण्यात आल्याचे इराणकडून मंगळवारी जाहीर करण्यात आले. नेमक्या किती जणांना आणि कोणाला अटक करण्यात आली, हे मात्र स्पष्ट झालेले नाही. या घटनेनंतर इराणवर आंतरराष्ट्रीय दबाव वाढला होता, त्यामुळे, ही कारवाई करण्यात आली.
अमेरिकेने इराणच्या कुद फौजांचे प्रमुख कासीम सुलेमानी यांची हत्या केल्यानंतर, इराणने अमेरिकेच्या इराकमधील लष्करी तळांना लक्ष्य केले होते. याच कारवाई दरम्यान, गेल्या आठवड्यात इराणच्या क्षेपणास्त्रामुळे तेहरानवरूनच उड्डाण केलेले युक्रेनचे प्रवासी विमानही कोसळले. या घटनेत विमानातील १७६ जणांचा मृत्यू झाला होता. त्यानंतर इराणवर आंतरराष्ट्रीय दबाव वाढला होता, तसेच तीन दिवसांपासून अंतर्गत आंदोलनांनाही सुरुवात झाली आहे. 'हुकूमशहाला मृत्यूदंड द्या,' अशा मागण्या करणारे आंदोलक सोमवारी रात्रीही रस्त्यांवर दिसून आले.
अमेरिकेची गुप्तचर संस्था 'सीआयए'ने क्षेपणास्त्र हल्ल्यातच हे विमान पडल्याचे सांगितले होते. मात्र, इराणने सुरुवातीला हा आरोप फेटाळला होता. शनिवार रिव्हॉल्युशनरी गार्ड्सच्या अधिकाऱ्यांनी चुकून हे विमान पाडले गेले, अशी कबुली दिली. दरम्यान, या प्रकरणात विस्तृत तपास करण्यात येत असून, काही जणांना अटक करण्यात आल्याची माहिती सरकारी प्रवक्ते गुलामहुसेन इस्मायली यांनी दिली. 'एखाद्या घटनेमध्ये कोणाची चूक असेल किंवा कोणाचे दुर्लक्ष झाले असेल, तरीही त्याला शिक्षा मिळेल,' अशी भूमिका इराणचे अध्यक्ष हसन रुहानी यांनी घेतली आणि त्यानंतर काही वेळात सरकारी प्रवक्त्याने अटकेची माहिती माध्यमांना दिली.
रुहानी म्हणाले, 'या घटनेतून आपण हा धडा घेतला आहे, की एखाद्या शिक्षा होणे आवश्यक असेल, तर त्याला शिक्षा होईलच. न्यायसंस्थेने विशेष न्यायालयांची स्थापना करावी, त्यामध्ये उच्चस्तरीय न्यायाधीश आणि विविध तज्ज्ञ असावेत. सर्व जगाचे या प्रक्रियेकडे लक्ष आहे. एखाद्या कोणत्या व्यक्तीने बटण दाबले आणि ही चूक झाली अशी पद्धत नाही. त्या ठिकाणी अन्यही व्यक्ती होत्या आणि मला ही गोष्ट जनतेला स्पष्टपणे सांगायची आहे. सर्व दु:खांचे कारण अमेरिकाच आहे. मात्र, याचा अर्थ असा नाही, की आपण आपल्या मुळाशी पाहणार नाही. या घटनेत अगदी सुरुवातीपासून काय झाले, हे सर्वांना सांगितले पाहिजे आणि अशी चूक पुन्हा होणार नाही, याची हमी घेतली पाहिजे.'