तुर्कीत लग्न समारंभावर अतिरेकी हल्ला, ५० ठार

मटा ऑनलाइन वृत्त । अंकारा

सीरिया सीमेजवळ तुर्कीतील गाझियनटेप शहरात एका लग्न समारंभावर दहशतवाद्यांनी केलेल्या आत्मघातकी हल्ल्यात ५० ठार, तर ९४ पेक्षा अधिक लोक जखमी झाले असून हा हल्ला आयसिसने घडवल्याची शक्यता व्यक्त करण्यात येत आहे.

गाझियनटेप शहराचे गव्हर्नर अली येरलिकाया यांच्या कार्यालयाकडून या हल्ल्याच्या वृत्ताला दुजोरा देण्यात आला आहे. स्थानिक वेळेनुसार रात्री १० वाजताच्या सुमारास हा हल्ला झाला.

या हल्ल्याची अद्याप कोणत्याही दहशतवादी संघटनेने जबाबदारी स्वीकारलेली नसली तरी सत्ताधारी जस्टीस अॅण्ड डेव्हलपमेंट पार्टीचे खासदार समील तय्यार यांनी हल्ल्यामागे आयसिसचा हात असण्याची शक्यता व्यक्त केली आहे तर गव्हर्नर अली यांनी हल्ल्याचा तीव्र शब्दांत निषेध केला आहे.