ऑस्ट्रेलियाकडून शांततेचे आवाहन

नवी दिल्ली : भारताने पाकिस्तानात घुसून हवाई हल्ल्याद्वारे दहशतवादी तळ उद्ध्वस्त केल्यानंतर ऑस्ट्रेलियाने भारत व पाकिस्तान या दोन्ही देशांना संयम पाळण्याचे आवाहन केले आहे. पाकिस्तानने 'जैश-ए-महम्मद'सह त्यांच्या भूमीवरून चालणाऱ्या सर्व दहशतवादी कारवाया तातडीने थांबविल्या पाहिजेत व अशा संघटनांवर अर्थपूर्ण व तातडीची कारवाई केली पाहिजे, असेही ऑस्ट्रेलियाच्या परराष्ट्र मंत्रालयाने म्हटले आहे.

'भारत व पाकिस्तान या दोन्ही देशांनी सद्यस्थितीत संयम पाळणे आवश्यक आहे. प्रादेशिक शांतता व सुरक्षितता धोक्यात येईल, असे कुठलेही कृत्य टाळावे आणि चर्चेच्या मार्गाने या समस्येवर शांततापूर्ण तोडगा काढावा,' असे ऑस्ट्रेलियाच्या भारतातील दूतावासातर्फे प्रसृत करण्यात आलेल्या या निवेदनात नमूद करण्यात आले आहे.