'या' दोन देशातील युद्ध पेटले; तुर्की-रशियाही युद्धात उतरणार?

बाकू: आर्मेनिया आणि अजरबैझान या देशांमध्ये रविवारपासून सुरू झालेल्या युद्धाची तीव्रता वाढली आहे. दोन्ही देशांनी एकमेकांच्या हद्दीतील ठिकाणांवर हल्ला केल्याचा आरोप केला आहे. तुर्कीने एफ-१६ या विमानाने आमचे सुखोई-२५ विमान पाडले असल्याचा आरोप आर्मेनियाने केला आहे. आता या युद्धामुळे तुर्की आणि रशियाही एकमेकांसमोर उभे ठाकणार असल्याची भीती व्यक्त करण्यात येत आहे.

आर्मेनियाचे लढाऊ विमान पाडल्याचा दावा तुर्कीने फेटाळून लावला आहे. आर्मेनियाने स्वस्तातील प्रपोगंडा करण्याऐवजी त्या प्रदेशावरील ताबा सोडावा, असे तुर्कीने म्हटले आहे. तुर्कीचे राष्ट्रपती रेसेप एर्दोगान यांनी अजरबैझानला नागोर्नो-काराबाखवर ताबा मिळवून देण्यासाठी मदत करणार असल्याचे म्हटले. तर, रशिया आणि अमेरिकेने दोन्ही देशांना शांततेचे आवाहन केले आहे. युद्ध सुरू असेपर्यंत कोणतीही चर्चा करणार नसल्याचे आर्मेनियाच्या पंतप्रधानांनी म्हटले.

वाचा: आर्मेनिया आणि अजरबैझानमध्ये युद्ध पेटले; १६ ठार

दोन्ही देशांनी एकमेकांच्या सैन्याचे मोठे नुकसान केले असल्याचा दावा केला आहे. अजरबैझानचे ८० आर्मर्ड व्हेइकल, ४९ ड्रोन आणि ४ हेलिकॉप्टर पाडले असल्याचा दावा आर्मेनियाने केला आहे. दोन्ही देशांमध्ये मार्शल लॉ घोषित करण्यात आला आहे. आर्मेनियाने १८ वर्षावरील कोणत्याही नागरिकास देश सोडून जाण्यास मनाई केली आहे. या युद्धात दोन्ही बाजूने १०० हून अधिकजणांचा मृत्यू झाला आहे. तर, शेकडोजण जखमी आहेत.

वाचा: उत्तर कोरियाची क्रूरता; दक्षिण कोरियाच्या अधिकाऱ्याची 'अशी' केली हत्या

रशिया आणि तुर्कीत युद्ध?

आर्मेनिया आणि अजरबैझानमध्ये वाढत्या युद्धामुळे रशिया आणि तुर्कीदेखील या युद्धात उतरण्याची शक्यता निर्माण झाली आहे. रशियाने आर्मिनियाला पाठिंबा दिला आहे. तर, दुसरीकडे अजरबैझानसोबत नाटो, तुर्की आणि इस्रायलसारखे देश आहेत. न्यूयॉर्क टाइम्सने दिलेल्या वृत्तानुसार, आर्मेनिया आणि रशियात संरक्षण करार आहे. त्यामुळे आर्मेनियाच्या भूमीवर युद्ध सुरू झाल्यानंतर रशिया या करारानुसार मदतीसाठी धावून येऊ शकतो. त्याशिवाय आर्मेनियामध्ये रशियाचे लष्करी तळदेखील आहे.

वाचा: पाहा: युक्रेनमध्ये हवाई दलाच्या विमानाला अपघात; २२ जवान ठार

युद्ध कशामुळे सुरू?

आर्मेनिया आणि अजरबैझान या दोन्ही देशांना ४४०० चौकिमी क्षेत्रफळ असणाऱ्या नागोर्नो-काराबाख भागावर ताबा मिळवायचा आहे. तर, दुसरीकडे नागोर्नो-काराबाख स्वत:ला एक स्वतंत्र देश असल्याचा दावा करत आहे.