Pakistan baloch बलुच बंडखोरांची नवी रणनिती! पाकिस्तान सरकारची डोकेदुखी वाढली

इस्लामाबाद: पाकिस्तानच्या दडपशाही विरोधात लढणाऱ्या बलुच बंडखोरांनी आता सरकारविरोधात नवीन रणनिती आखली आहे. बलुच बंडखोरांच्या या नव्या डावामुळे पाकिस्तान सरकार हैराण झाले आहे. बलुच बंडखोरांनी आता चिनी नागरिकांना लक्ष्य करण्यास सुरुवात केली आहे. त्यामुळे इम्रान खान सरकारची डोकेदुखी वाढली आहे.

पाकिस्तानची आर्थिक राजधानी समजल्या जाणाऱ्या कराचीमध्ये मागील काही दिवसांमध्ये चिनी नागरिकांवर जीवघेणा हल्ला झाला. आतापर्यंत ग्वादर बंदरात सीपीईसी अंतर्गत बनवण्यात येत असणाऱ्या चिनी नाविक तळ आणि डीप सी पोर्टला विरोध करण्यासाठी बलुच बंडखोरांनी आता चिनी नागरिकांवर हल्ला करण्यास सुरुवात केली आहे.

सामरीकदृष्ट्या बलुचिस्तान पाकिस्तानसाठी महत्त्वाचे आहे. अफगाणिस्तान आणि इराणसोबत या प्रातांच्या सीमा जोडल्या गेल्या आहेत. ग्वादर बंदरदेखील बलुचिस्तान भागात येते. या बंदराचे नियंत्रण आता चीनकडे सोपवण्यात आले आहे. बलुच बंडखोरांना भारतीय गुप्तचर संस्था 'रॉ' मदत करत असल्याचा आरोप पाकिस्तानकडून होत असतो. तर, भारताने अनेकदा हे आरोप फेटाळून लावले आहे.