पाकिस्तान: कट्टरतावाद्यांचा पोलिसांवर हल्ला; उपअधीक्षकाला मारहाण, पाच जणांचे अपहरण

लाहोर: पाकिस्तानमध्ये मागील काही दिवसांपासून सुरू असणारा हिंसाचार आटोक्यात येण्याची कोणतीच चिन्ह दिसत नाही. पाकिस्तान सरकारने बंदी घातलेल्या तहरीक-ए-लब्बैकच्या (टीएलपी) कार्यकर्त्यांकडून हिंसाचार सुरूच असून थेट पोलीस अधिकाऱ्यालाच ओलीस ठेवून अमानुष मारहाण करण्यात आली. त्याशिवाय अन्य चार पोलिसांनाही ओलीस ठेवण्यात आले आहे. हे पोलीस अधिकारी लाहोरमधील यतीम खाना चौकाजवळील परिसर रिकामा करण्यास गेले होते.

कॅपिटल सिटी पोलीस ऑफिसचे प्रवक्ते राणा आरिफ यांनी 'डॉन' या वृत्तपत्राला सांगितले की, टीएलपीच्या कार्यकर्त्यांनी पेट्रोल बॉम्बने पोलिसांवर हल्ला केला. यामध्ये जखमी झालेल्या ११ पोलिसांवर रुग्णालयात उपचार सुरू आहेत. पोलिसांनी प्रत्युत्तरात केलेल्या कारवाईत तीन ठार झाले असून अनेक जखमी आहेत. टीएलपीने एक व्हिडिओ शेअर केला असून यामध्ये अपहरण केलेले अधिकारी दिसत आहेत.

वाचा: Explainer अफगाणिस्तानमधून अमेरिका सैन्य माघारी घेणार; भारताची चिंता वाढली



वाचा: पाकिस्तान असुरक्षित, तातडीने मायदेशी परता!; 'या' देशाची नागरिकांना सुचना

प्रकरण काय?

तहरीक-ए-लब्बैकच्या (टीएलपी) समर्थकांनी प्रेषित मोहम्मद पैगंबर यांचे कार्टून प्रकाशित केल्याच्या मुद्यावरून पाकिस्तानमधील फ्रान्सच्या राजदूताची हकालपट्टी करावी आणि फ्रान्ससोबतचे संबंध तोडावेत अशी मागणी करत आंदोलन सुरू केले. त्यासाठी पाकिस्तान सरकारला २० एप्रिलपर्यंतची मुदत दिली. मात्र, पोलिसांनी सोमवारी टीएलपीचे प्रमुख साद हुसैन रिझवी यांना अटक केली. त्यानंतर टीएलपीच्या कार्यकर्त्यांनी देशभरात आंदोलन सुरू केले. टीएलपीवरही बुधवारी दहशतवादविरोधी कायद्यानुसार बंदी घालण्यात आली आहे. मात्र, तरीही साद रिझवीच्या सुटकेसाठी पाकिस्तानच्या अनेक शहरांमध्ये हजारो लोक रस्त्यावर उतरले आहेत.

वाचा: जगभरात करोनाचे थैमान; मृतांची संख्या ३० लाखांहून अधिक

कोण आहे साद?

पाकिस्तानमधील २०१८ च्या निवडणुकीत २५ लाख मते मिळवणाऱ्या टीएलपीने साद रिझवीच्या अटकेनंतर आंदोलन सुरू केले. साद रिझवी खादिम हुसैन रिझवीचा मुलगा आहे. काही महिन्यांपूर्वी त्यांचे अकस्मात निधन झाले होते. त्यानंतर साद यांच्याकडे पक्षाची धुरा आली. रिझवी समर्थक पाकिस्तानमध्ये असलेल्या ईशनिंदा कायदा रद्द न करण्यासाठी सरकारवर दबाव टाकत आहे. हा पक्ष कट्टरतावादी पक्ष म्हणून ओळखला जातो.