मृतांची संख्या वाढण्याची भीती
गृह मंत्रालयाचे प्रवक्ते तारिक अरियान यांनी सांगितले की, शिया बहुल दस्त-ए-बारची या भागातील सय्यद अल-शाहदा शाळेजवळ झालेल्या घटनास्थळावरून रुग्णवाहिकेच्या माध्यमातून जखमींना रुग्णालयात दाखल करण्यात आले. अधिकाऱ्यांनी मृतांची संख्या वाढण्याची भीती व्यक्त केली आहे. हा स्फोट अतिशय भीषण होता असे स्थानिकांनी सांगितले. स्थानिक रहिवासी नसीर रहिमी यांनी सांगितले की, त्यांनी तीन वेगवेगळ्या स्फोटाचा आवाज ऐकला. मात्र, या दाव्याला अधिकृत दुजोरा मिळाला नाही.
सायंकाळी झाला स्फोट
त्यांनी सांगितले की, स्थानिक वेळ सायंकाळी ४.३० वाजण्याच्या सुमारास हा स्फोट झाला. या दरम्यान विद्यार्थीनी शाळेतून बाहेर पडत होत्या. स्फोटात जखमी झालेली १५ वर्षीय विद्यार्थीनी जाहराने सांगितले की, मी मैत्रिणींसोबत होती आणि शाळेतून बाहेर पडलो होतो. त्याचवेळेस मोठा स्फोट झाला. १० मिनिटानंतर आणखी एक स्फोट झाला आणि त्यानंतर आणखी एक स्फोट झाला.
हल्ला कोणी घडवला?
या दहशतवादी हल्ल्याची जबाबदारी कोणत्याच संघटनेने घेतली नाही. याआधी शिया बहुल भागात झालेल्या स्फोटांची जबाबदारी इस्लामिक स्टेट या दहशतवादी संघटनेने घेतली होती. तर, कट्टरतावादी सुन्नी मु्स्लिम गटानेही अफगाणिस्तानमध्ये अल्पसंख्याक शिया मुस्लिमांविरोधात युद्ध करण्याची घोषणा केली आहे. अमेरिकेने मागील वर्षी एका प्रसुती रुग्णालयावर झालेल्या हल्ल्यासाठी इस्लामिक स्टेटला जबाबदार ठरवले होते.
नाराज स्थानिकांकडून रुग्णवाहिकेवर हल्ला
आरोग्य मंत्रालयाने दिलेल्या माहितीनुसार, नाराज झालेल्या जमावाने रुग्णवाहिकेवर हल्ला केला आणि आरोग्य कर्मचाऱ्यांना मारहाणही केली. त्यांनी या नाराज जमावाला सहकार्य करण्याचे आवाहन केले आणि रुग्णवाहिकेला घटनास्थळी घेऊन जाण्याची विनंती केली.