जर्मन फुटबॉल संघाच्या बसवर हल्ला

मटा ऑनलाइन वृत्त । डॉर्टमंड (जर्मनी)

एका चॅम्पियन्स लीगमध्ये सहभागी होण्यासाठी जात असलेल्या जर्मनीतील बोरोसिया डॉर्टमंड फुटबॉल संघाच्या बसवर हल्ला झाल्यानं खळबळ उडाली आहे. खेळाडूंनी भरलेल्या बसजवळ बॉम्बस्फोट घडवून हा हल्ला करण्यात आला. त्यात मार्क बारत्रा हा खेळाडू जखमी झाला असून त्याला उपचारासाठी रुग्णालयात दाखल करण्यात आलं आहे.

पोलिसांनी दिलेल्या माहितीनुसार, खेळाडूंना घेऊन जाणारी बस सुरू झाल्यानंतर काही वेळातच हा स्फोट झाला. स्फोटात बसचंही बरंच नुकसान झालं आहे. हा हल्ला नेमका कुणी व कशाच्या उद्देशानं केला, याबाबत अद्याप काहीही कळू शकलेलं नाही. या घटनेनंतर बोरोसिया डॉर्टमंड संघाचा मोनाकोशी होणारा सामना पुढं ढकलण्यात आला आहे. स्टेडियममधील प्रेक्षकांना कसलाही धोका नसल्याचं पोलिसांनी स्पष्ट केलं आहे.